Azərbaycan dünya çempionudur!
Serbiyanın paytaxtı Belqradda keçirilən dünya çempionatına yekun vurulub.
Mediasport.az xəbər verir ki, yunan-Roma güləşi üzrə millimiz tarixi uğura imza atıb.
2 qızıl və 3 gümüş medal qazanan yığmamız 120 xal toplayaraq tarixində ilk dəfə komanda hesabında dünya çempionu olub.
Daha öncə sərbəst güləşdə də belə bir uğurumuz olmayıb. Buna qədər ən yaxşı nəticələrimiz sərbəst güləşdə 2009 və 2010, yunan-Roma güləşində isə 2015 və 2022-ci illərdə qeydə alınıb. Həmin dünya çempionatlarında millilərimiz komanda hesabında 2-ci yeri tutmuşdular.
Yunan-Roma güləşi üzrə millimiz həm medalların əyarına, həm də toplanan xallara görə də dünya çempionatlarında Azərbaycan güləş yığmaları tarixinin ən yaxşı nəticəsinə imza atıb.
Mundialda İran (102) ikinci, Türkiyə (93) isə üçüncü yeri tutub.
Xatırladaq ki, bu yarışda Eldəniz Əzizli (55 kq) ilə Rafiq Hüseynov (82 kq) dünya çempionu olub. Murad Məmmədov (63 kq), Həsrət Cəfərov (67 kq) və Sənan Süleymanov (77 kq) isə gümüş medal qazanıb.
Komandamız 67 və 77 kq-da Olimpiadaya lisenziyanı təmin edib.
