Azərbaycan milli komandası 2-ci yerlə AVRO-2024-ə vəsiqə qazanıb
Amputant futbolçular arasında Azərbaycan milli komandası AVRO-2024-ə vəsiqə qazanıb.
Mediasport.az xəbər verir ki, Avropa Amputasiya Futbolu Federasiyasının (EAFF) təşkil etdiyi Millətlər Liqasının D divizionunda komandamız 2-ci yeri tutub.
Millimiz bununla gələn il Fransanın paytaxtı Parisdə keçiriləcək Avropa çempionatına lisenziya əldə edib.
Komandamız Şotlandiyanın Dalqeti Bey şəhərində keçirilən yarışda meydan sahibləri, Niderland, Kosovo və Albaniya ilə mübarizə aparıb.
Niderlanda 0:5 hesabı ilə uduzan futbolçularımız Kosovoya 6:0, Şotlandiyaya 5:1 və Albaniyaya 8:0 hesabları ilə qalib gəlib.
9 xalla qrup ikincisi olan yığmamız yalnız Niderlanddan geri qalıb.
Futbolçularımızın Böyük Britaniyaya səfəri ANAMA (Azərbaycan Respublikasının Minatəmizləmə Agentliyi) və AFFA tərəfindən təmin edilib.
Qeyd edək ki, işğaldan azad edilmiş ərazilərimizdə düşmən tərəfindən basdırılan minaların partlaması nəticəsində xəsarət alan şəxslərdən ibarət kollektiv Avropa çempionatının final mərhələsində ilk dəfə iştirak edəcək. 16 ölkənin mübarizə aparacağı final mərhələsində dünya çempionu Türkiyə ilə yanaşı, İngiltərə, Fransa, İspaniya, İtaliya, Almaniya və Polşa kimi güclü yığmalar iştirak mübarizə aparacaqlar.
