5-ci Dünya Köçəri Oyunlarının açılış mərasimi keçirildi - VİDEO
Qazaxıstanın paytaxtı Astana şəhərində 5-ci Dünya Köçəri Oyunlarının açılış mərasimi keçirilib.
Mediasport.az xəbər verir ki, dünən "Astana" arenada keçirilən mərasimdə əvvəlcə Qazaxıstan bayrağı qaldırılıb və Dövlət Himni səsləndirilib.
Sonra iştirakçı ölkələrin paradı baş tutub. Tədbirdə Qazaxıstan Respublikası Baş nazirinin birinci müavini, oyunların Təşkilat Komitəsinin rəhbəri Roman Sklyar və Dünya Etnosport Federasiyasının prezidenti Nəcməddin Bilal Ərdoğan çıxış ediblər.
Qazaxıstan Respublikasının Prezidenti Kasım-Jomart Tokayev tədbir iştirakçılarını salamlayıb və yarışı açıq elan edib. Rəsmi çıxışlardan sonra tədbir bədii hissə ilə davam edib. Tədbirin gedişində köçəri tarixini tərənnüm edən musiqi nömrələri səsləndirilib.
Açılış mərasimini Azərbaycan Respublikasının gənclər və idman naziri Fərid Qayıbov və ədliyyə naziri Fərid Əhmədov da stadionda izləyiblər.
5-ci Dünya Köçəri Oyunları 13 sentyabra qədər davam edəcək. Yarışlarda ölkəmiz 8 növdə - qazaq güləşi, manqala, aba, koreş, mas-reslinq, kuraş, alış, ənənəvi oxatma üzrə 54 idmançı ilə təmsil olunur.
