Bakıda keçirilən Avropa çempionatını İspaniya millisi qazandı
Bakıda keçirilən 17 yaşadək qız həndbolçular arasında Avropa çempionatına yekun vurulub.
mediasport.az xəbər verir ki, Bakı İdman Sarayında baş tutan final qarşılaşmasında İspaniya millisi Sloveniyanı 28:20 hesabı ilə məğlub edərək qızıl medallara sahib çıxıb.
Farer adalarını 32:27 hesabı ilə üstələyən Litva 3-cü, İsrailə 32:31 hesabı ilə qalib gələn Bosniya və Herseqovina 5-ci yeri tutub. 7-ci yer uğrunda matçda Yunanıstan Gürcüstandan güclü olub – 29:17. Azərbaycan millisi isə 10 komanda arasında sonuncu pillədə qərarlaşıb.
Matçlardan sonra mükafatlandırma mərasimi təşkil edilib. Tədbirdə çıxış edən Avropa Həndbol Federasiyasının (EHF) nümayəndəsi Ştefan Lövqren Bakıdakı qitə birinciliyinin yüksək səviyyədə təşkil olunduğunu diqqətə çatdırıb. O, Azərbaycan Həndbol Federasiyasının (AHF) fəaliyyətini yüksək qiymətləndirib.
Turnirin ən yaxşı oyunçularına, yarışın hakimlərinə, EHF və AHF nümayəndələrinə hədiyyələr verildikdən sonra qalib komandaların üzvlərinə medallar təqdim olunub. Mükafatları Ştefan Lövqren, Azərbaycan Həndbol Federasiyasının vitse-prezidenti Orxan Abbasov və baş katibi Yusif Atakişiyev veriblər.
