Antalyada 8 cüdoçumuz mübarizəyə qoşulur - "Böyük Dəbilqə"
Bu gün Türkiyənin Antalya şəhərində cüdo üzrə "Böyük Dəbilqə" turniri bu gün start götürəcək.
mediasport.az xəbər verir ki, ilk gündə Azərbaycanın 8 idmançısı 5 çəki dərəcəsində mübarizəyə qoşulacaq.
Kişilərin yarışında 60 kq-da Nazir Talıbov mübarizəyə 1/32 final mərhələsindən başlayacaq. 22 yaşlı cüdoçu çexiyalı David Pulkrabeklə qarşılaşacaq.
İlk raunddan azad olan eyni çəkidəki digər təmsilçimiz Kəramət Hüseynov 1/16 finalda rəqibini gözləyir. Gənclər arasında Avropa çempionunun rəqibi Muhammadsoleh Quvatov (Tacikistan) - Dilşodbek Baratov (Özbəkistan) görüşünün qalibi olacaq.
66 kq çəkidə də Azərbaycanın iki cüdoçusu yarışacaq. Yaşar Nəcəfov 1/32 finalda İtaliya idmançısı Fabio Basillə münasibətlərinə aydınlıq gətirəcək.
Böyük Dəbilqənin üçqat qalibi Orxan Səfərov mübarizəyə 1/16 finaldan qoşulacaq. 32 yaşlı Avropa çempionu bu raundda Hekim Aqamammedov (Türkmənistan) - Antoni De Anqelis (Latviya) cütlüyünün qalibini sınağa çəkəcək.
Qadınların yarışında 48 kq çəkidə Azərbaycanı iki cüdoçu təmsil edəcək. Leyla Əliyeva 1/32 finalda Mariya Buyoku (Ukrayna), Könül Əliyeva isə 1/16 finalda Mari Di Varqas Leyi (Çili) üstələməyə çalışacaq.
52 kq çəkidə çıxış edəcək Gültac Məmmədəliyeva 1/32 finalda kanadalı Kelli Dequçi ilə görüşəcək. Martın 24-də Gürcüstanda keçirilən Böyük Dəbilqəni bürünc medalla başa vuran Məmmədəliyeva Kanada idmançısını məğlub edərsə, növbəti raundda cənubi koreyalı Kanq Yujeonqla qarşılaşacaq.
Fidan Əlizadə də yarışa 1/32 finaldan başlayacaq. 57 kq çəkidə Yulia Kovalçuku (Polşa) sınağa çəkəcək yeniyetmələr arasında Avropa çempionu olmuş Əlizadə bu mübarizədən qalib ayrılsa, 2022-ci ildə Bakıda keçirilən Böyük Dəbilqəni qazanan Krista Dequçiyə (Kanada) rəqib olacaq.
"Böyük Dəbilqə"yə aprelin 2-də yekun vurulacaq.
