Beynəlxalq Atletlər Forumunda Azərbaycanı kim təmsil edəcək?
1-2 oktyabrda İsveçrənin Lozanna şəhərində keçiriləcək Beynəlxalq Atletlər Forumunda Azərbaycanı cüdo yığmamızın keçmiş üzvü Rüstəm Orucov təmsil edəcək.
Mediasport.az xəbər verir ki, toplantıda Beynəlxalq Olimpiya Komitəsinin (IOC) Atletlər Komissiyasının (AK) 400-dən çox nümayəndəsi olacaq.
Açılış günü komissiyanın son işlərinin icmalı və onun yenilənmiş strategiyası müzakirəyə çıxarılacaq. Tədbir iştirakçıları AK-nın idarə olunması ilə bağlı fikir mübadiləsi apararaq müxtəlif sessiyalara qatılacaqlar.
Rusiya və ya Belarus pasportuna malik idmançıların beynəlxalq yarışlarda neytral statusda iştirakı ilə bağlı federasiyalar və təşkilatçılar üçün IOC və AC tərəfindən təqdim olunan tövsiyələr də müzakirə ediləcək. Daha sonra idmançılara dəstək, Olimpiya Hərəkatının maliyyələşdirmə modeli və onları IOC vasitəsilə dəstəkləmək üçün mövcud proqramlar, o cümlədən Olimpiya Həmrəyliyi, “Athlete 365” və Ümumdünya Olimpiya Tərəfdaşları tərəfindən təqdim olunan proqramlar da müzakirəyə çıxarılacaq.
Forumun ikinci günündə qarşıdan gələn “Paris-2024” Yay Olimpiya Oyunları haqqında müzakirələr aparılacaq, Ümumdünya Antidopinq Agentliyi (WADA) və Beynəlxalq Test Agentliyinin nümayəndələri ilə təmiz idmanın əhəmiyyətini və rəqabət manipulyasiyasının qarşısının alınması haqqında geniş söhbət olacaq. Tədbirdə İdmanda Korrupsiyaya Qarşı Beynəlxalq Tərəfdaşlıq (IPACS) məsələlərinə də toxunulacaq. Bu, idmanda korrupsiyaya qarşı mübarizədə səyləri birləşdirmək üçün idman təşkilatlarını, hökumətləri və hökumətlərarası təşkilatları bir araya gətirən çoxtərəfli təşəbbüsdür.
Qeyd edək ki, Rüstəm Orucov həm də Azərbaycan Atletlər Komissiyasının sədridir.
Rio-2016 Yay Olimpiya Oyunlarının gümüş medalçısı Avropa çempionu və dünya ikincisi olub.
