Dünya və Avropa çempionatlarının, Millətlər Liqasının formatı dəyişdi
UEFA Millətlər Liqası, Avropa və Dünya çempionatlarının seçmə mərhələlərinin formatında dəyişiklik edilib.
mediasport.az xəbər verir ki, qurumun İcraiyyə Komitəsinin iclasına qəbul edilmiş qərara əsasən, yeniliklər 2024-cü ildən tədbiq ediləcək.
Millətlər Liqasında "Dördlər finalı"ndan öncə pley-off oyunları keçiriləcək. A Liqasında qrup birinciləri ilə ikinci yeri tutan komandalar, ev və səfərdə olmaqla, 1/4 final matçları keçirəcəklər və qaliblər "Dördlər finalı"na vəsiqə əldə edəcəklər.
Bundan başqa, A Liqasında üçüncü yeri tutanlar B Liqasının ikinciləri, B Liqasında üçüncü olanlar isə C Liqasının ikinciləri ilə aşağı diviziona düşməmək və ya əksinə, yuxarı liqaya qalxmaq uğrunda pley-off matçları oynayacaqlar.
Seçmə mərhələlərdə isə qrupların sayı artırılacaq. Ölkələr hərəsində 4 və ya 5 komanda olmaqla 12 qrupa bölünəcək. Qrup qalibləri Avropa və ya dünya çempionatlarına birbaşa vəsiqə qazanacaq. İkinci yeri tutan yığmalar isə nüfuzlu turnirlərə ya birbaşa, ya da pley-off matçlarından sonra yollanmaq hüququ əldə edəcəklər.
Həmçinin, UEFA 2024-cü ildə keçiriləcək Avropa çempionatında komanda sayının artırılmayacağını açıqlayıb. Yeni format 2024-cü ildən sonra tətbiq olunacaq.
