Yüksək Liqada 12-ci tur keçirilib: “Azərreyl” liderliyini qoruyub
Qadın voleybolçuların Yüksək Liqasında 12-ci turun oyunları keçirilib.
Mediasport.az xəbər verir ki, turun bütün görüşləri eyni gündə təşkil olunub.
"Gəncə" doğma meydanda “Azərreyl"i qəbul edib. “Sarı-göylər” çempionatın liderini ilk setdə məğlub etsə də, sonda Bakı təmsilçisi qarşılaşmadan 3:1 hesablı qələbə ilə ayrılıb.
Günün digər matçında “Murov Az Terminal” və “Milli Aviasiya Akademiyası” komandaları üz-üzə gəliblər. Gənclər və İdman Nazirliyinin Voleybol Mərkəzində təşkil olunan bu oyunda murovlular 3:1 hesablı qalibiyyətə sevinən tərəf olublar.
Turun sonuncu dueli “Abşeron” və UNEC klubları arasında olub. UNEC-in idman zalında baş tutan görüşdə Famil Ağayevin komandası 3:0 hesabı ilə qalib gəlib.
Bu nəticələrdən sonra xallarını 30-a çatdıran “Azərreyl” liderliyini qoruyub. “Murov Az Terminal” 29 xalla 2-ci, “Abşeron” 24 xalla 3-cü, “Gəncə” 15 xalla 4-cü, “Milli Aviasiya Akademiyası” 10 xalla 5-ci, qələbəsi və xalı olmayan UNEC isə sonuncu pillədə qərarlaşıb.
