AFFA Region Liqasında yeni mövsüm nə vaxt başlanacaq?
AFFA Region Liqasında yeni mövsümün startı xeyli yubanıb.
AFFA-dan Mediasport.az saytına verilən məlumata görə, müraciət edənlərin say çoxluğundan dolayı qeydiyyat müddəti uzadıldığı üçün püşkatma və çempionatın startı gecikir.
Burada dəqiqləşdirilməsi aparılan bəzi texniki məsələlər də var.
Federasiya birinciliyin daha ciddi və sanballı təşkilində maraqlıdır.
Qurumdan öyrəndik ki, yarış dekabrın sonunadək, ən pis halda yanvarın əvvəli başlanacaq. Yəni, keçirilməməsi müzakirə mövzusu deyil.
Birincilik uğrunda mübarizə aparacaq klub sayı 50-dən çoxdur. Bir neçə zona üzrə ümumilikdə 55-58 kollektiv yarışacaq.
Xatırladaq ki, Region Liqasının oktyabrın sonunda, sonra noyabrın əvvəlində, ardınca noyabrın sonunda və ən yekunda dekabrın əvvəlində start götürəcəyi deyilirdi.
AFFA-nın təşkil etdiyi yarışın son qalibi "Qusar" komandası olub. Şimallılar 2022/2023-cü illər mövsümünün finalında “Çinar-Zəngilan”ı məğlub ediblər (2:0).
