DİN: "Həmin azarkeşlər ictimai qaydanı, təhlükəsizliyi pozublar"
Bəzi klubların azarkeş qrupları Premyer Liqanın 2022-ci ildə keçiriləcək son iki tur matçında iştirak etməyəcək.
mediasport.az xəbər verir ki, buna 16-cı turda keçirilmiş "Neftçi" - "Qarabağ" (1:4) matçından əvvəl Ağdam təmsilçisinin 3 azarkeşinin saxlanılması səbəb olub.
“İmarət” azarkeş qrupunun sosial şəbəkə səhifəsinin yaydığı məlumatda deyilir:
"Qarabağ" - "Neftçi" matçından əvvəl oyunun keçirildiyi stadiona doğru yürüşlə gedən azarkeş qrupumuzun 3 nəfər üzvü pirotexniki vasitədən istifadə etdiyi əsas gətirilərək Nizami Rayon Polis İdarəsinə aparılmışdır. Bir nəfər üzvümüz polis tərəfindən 500 manat cərimə edilib, digər üzvümüz isə Nizami Rayon Məhkəməsi tərəfindən 8 sutka inzibati həbs cəzası alıb. Tək səbəb oyundan əvvəl azarkeşlərin pirotexniki vasitədən istifadə etməsidir".
Bu hadisədən sonra Premyer Liqa klublarının "Forza Neftçi", "Turan Ultras", "Dənizçilər", "Soldati Sabah", "Sektor 56" kimi fan-klubları da bəyanat yayaraq, son iki turun oyunlarında iştirak etməyəcəklərini söyləyib: "Azərbaycan Premyer Liqasının son turunda keçirilmiş "Neftçi" - "Qarabağ" oyunundan əvvəl və oyun zamanı azarkeşlərə qarşı edilmiş haqsızlıqlara və onların həbs olunmasına etiraz edirik. Bu haqsızlığın növbəti oyunlarda bizə və digər azarkeş qruplarına qarşı edilməyəcəyinə heç kim zəmanət verə bilməz. Tribunada rəqib ola bilərik, amma hamımız Azərbaycan tribunasının inkişafına çalışırıq. Bu haqsızlığı bir az daha göz önünə çıxarmaq üçün Azərbaycanın bütün azarkeş qruplarının qarşıdan gələn 2 oyunda iştirak etməyəcəyini bəyan edirik!"
Məsələ ilə bağlı Daxili İşlər Nazirliyinin KİV və İctimaiyyətlə Əlaqələr Şöbəsinin rəisi, polis mayoru Elşad Hacıyevlə əlaqə saxladıq. Qurum rəsmisi saytımızın sorğusuna cavab olaraq açıqladı ki, azarkeş qruplarının oyunlarda iştirak edib-etməməsi polisin səlahiyyətində deyil:
"Sözügedən matçda həmin şəxslərin əməllərinə görə, barəsində qanunvericiliyə uyğun olaraq inzibati tənbeh tədbiri tətbiq olunub. Yol verilən nöqsan ictimai qayda pozuntusu olaraq qeydə alınıb. Həmin əmələ görə, barələrində məhkəmə qərarı ilə seçilmiş inzibati tənbeh tədbiri əmələ adekvatdır. Həmin şəxslər oyun keçirilən gün ictimai qaydanı, təhlükəsizliyi qadağan olunmuş əşyaların daşınması, xüsusilə də pirotexniki vasitələrdən istifadə ilə pozublar ki, bu da digər şəxslərin həyat və sağlamlığı üçün təhlükəli olduğu üçün əmələ hüquqi qiymət verilib. Digər halda isə onlar intizama dəvət olunan polis əməkdaşları tərəfindən tabesizlik göstəriblər. Bu səbədən adekvat olaraq barələrində müvafiq tədbirlərin görülməsi təmin olunub. Hazırda onların oyunlarda iştirak edib-etməməsi polisin səlahiyyətində deyil".
Mənbə: offsideplus.az
