Azərbaycandan qalmaqalla ayrılan futbolçu bölgə klubunda oynayacaq
Bu ilin yanvarında qanında Hepatit B virusu aşkarlandığına görə “Kəpəz”dən göndərilən Abdullahi Şuaybu Azərbaycana qayıdıb.
Mediasport.az xəbər verir ki, 22 yaşlı vinger “Qəbələ“də baxışdadır.
6 aydan çoxdur futbol oynamayan nigeriyalı ilkin baxışdan uğurla keçib və analizinin cavabı qənaətbəxş olub.
Bugünlərdə yenidən qan analizi verəcək Şuaybuda problem aşkarlanmasa, karyerasını 1-ci Liqa klubunda davam etdirəcək.
Xatırladaq ki, Gəncə klubundan meneceri Dmitri Selyukun açıqlamaları sonrası qalmaqalla ayrılan afrikalı Azərbaycana 2022-ci ilin yayında “Şerif”dən gəlib.
Ukraynalı meneceri onun sağlamlıq testlərinin dəyişdirildiyini və qorxulu xəstəlik daşıyıcısı olduğunu açıqlamışdı. Hətta Baş Prokurorluq məsələ ilə bağlı AFFA-ya məktub da ünvanlamışdı.
Agentin ölümcül xəstəliyi olmayan futbolçuya qarşı kampaniya aparmasının əsl səbəbi aralarının pozulması imiş.
O, "Kəpəz"in heyətində 45 oyun keçirib, 13 qol, 5 məhsuldar ötürmə ilə yadda qalıb.
