2-ci Liqa klubunun futbolçusu "Qarabağ"a transfer edildi
"Qarabağ" sürpriz transferlə diqqət çəkib.
Ağdam təmsilçisi Azərbaycan 2-ci Liqasında mübarizə aparan "Hypers Quba"nın futbolçusu Denis Ədilovu heyətinə qatıb.
Quba klubu məlumatı sosial şəbəkə hesabında paylaşaraq, futbolçuya uğurlar arzulayıb:
"Onun peşəkar karyerasında yeni bir mərhələ başlayır. "Hypers Quba" ailəsi olaraq Denisə yeni komandasında uğurlar diləyirik. İnanırıq ki, o, "Qarabağ"ın heyətində öz bacarıqlarını ən yüksək səviyyədə göstərəcək".
"Köhlən atlar"ın futbol akademiyasının meneceri Nail Kərimov Mediasport.az saytına bildirib ki, futbolçu "Qarabağ"ın əvəzedici komandasında forma geyinəcək:
"Denis 2004-cü il təvəllüdlü futbolçudur, cinahda oynayır. Əsas komandaya yüksəlib-yüksəlməyəcəyini deyə bilmərəm. Çünki əvəzedici komandamızda yetərincə istedadlı uşaq var.
Qurban Qurbanov zaman-zaman əsas komandada onlara şans verir, yoxlayır. Elə son olaraq "Kəpəz"lə yoxlama matçında Davud Məsumov, Hikmət Cəbrayılzadə, Şahismayıl Cəfərov və Amin Rzayevi meydana buraxmışdı. Davud qol da vurdu. Yəni, bu uşaqlar haqqında yekun qərarı baş məşqçi verir".
