"Var gücümlə çalışacağam ki, etimadı doğruldum" - "Neftçi"ni çalışdıran gürcüstanlı mütəxəssis
"İlk olaraq mənə göstərilən etimada görə klub rəhbərliyinə dərin minnətdarlığımı bildirirəm. Var gücümlə çalışacağam ki, etimadı doğruldum".
Mediasport.az xəbər verir ki, bunu "Neftçi" basketbol klubunun məşqçisi Davit Çivçivadze deyib.
Gürcü mütəxəssis Azərbaycan Basketbol Liqasının X turunun "Abşeron"la matçından sonra klubun mətbuat xidmətinə açıqlama verib:
"Əmzkar mübarizə apardıq. Oyunçularıma təşəkkürümü bildirirəm. Çox gərgin oyun oldu.
Hər iki komanda qarşılaşmaya qısa müddət ərzində hazırlaşmışdı. Buna baxmayaraq, çox yaxşı oynadıq, aqressivlik göstərdik. Ümid edirəm ki, növbəti qarşılaşmalarda daha yaxşı oyun nümayiş etdirəcəyik. Məşqlərdə olduğu kimi, komanda müdafiədə aqressiv, hücumda isə düzgün ötürmələr edərək yaxşı oyun göstərdi".
Xatırladaq ki, "Neftçi" "Abşeron"u 84:76 hesabı ilə məğlub edib.
