"Qarabağ" və Qurban Qurbanov ilin ən yaxşıları arasında - FOTOLAR
Azərbaycan idmanında 2024-cü ilin ən yaxşıları bəlli olub.
Mediasport.az xəbər verir ki, Gənclər və İdman Nazirliyinin təşkilatçılığı ilə keçirilən Qala mərasimdə “Qarabağ” müxtəlif nominasiyalarda ən yaxşılar sırasında yer alıb.
Buna komandanın il ərzində qazandığı nailiyyətlər səbəb olub. Ağdam klubu 2023/24 mövsümündə Azərbaycan çempionu adını 11-ci dəfə qazanıb.
“Qarabağ” ölkə kubokunu da əldə edərək “Qızıl dubl”a imza atıb. Ötən mövsümdə Avropa Liqasında pley-offu keçərək 1/8 finala qədər irəliləyən "köhlən atlar" bu mərhələyə yüksələn ilk Azərbaycan klubu kimi tarixə düşüb.
2024/25 mövsümündə ardıcıl 11-ci dəfə avrokubokların əsas mərhələsinə yüksələn Qurban Qurbanovun komandası Premyer Liqada qış fasiləsinə 1-ci pilədə yollanıb.
Bu uğurların nəticəsində "Qarabağ" İlin ən yaxşı kişi komandası seçilib. Mükafat klubun baş direktoru Emrah Çelikelə təqdim olunub.
Baş məşqçi Qurban Qurbanov isə İlin ən yaxşı məşqçisi nominasiyasında 3-cü yeri tutub.
