Azərbaycan - Avstriya oyununa qonaqlar üçün bilet satışı başlanılıb
Oktyabrın 16-da AVRO-2024-ün seçmə qrup mərhələsinin 6-cı turu çərçivəsində Bakıda keçiriləcək Azərbaycan - Avstriya qarşılaşmasında qonaqlar üçün nəzərdə tutulmuş biletlər satışa çıxarılıb.
Mediasport.az xəbər verir ki, bu barədə Avstriya Futbol Assosiasiyası (OFB) məlumat yayıb.
Tofiq Bəhramov adına Respublika stadionunda baş tutacaq görüşü canlı izləmək istəyən qonaqlar üçün ayrılan sektora biletlərin qiyməti 4 avro təşkil edir.
Qeyd edək ki, yığma komandamız qrupda 4 oyun keçirib və yarışa məhz Avstriya səfərində 1:4 hesablı məğlubiyyətlə başlayıb.
Canni De Byazinin komandası avstriyalılarla cavab duelinədək səfərdə Estoniyanın qonağı olacaq. Bu matç oktyabrın 13-də oynanılacaq.
Yığmamız 1 xalla Estoniya ilə 4-5-ci yerləri bölüşdürür. Avstriya isə Belçika ilə 13 xalla ilk iki pillədə qərarlaşıb.
