"De Bur hələ "Ayaks"a gəlməmişdi, ancaq Qurbanov artıq "Qarabağ"a rəhbərlik edirdi" - "Ajax Showtime"
Niderland mətbuatında "Qarabağ" haqda yazı dərc olunub.
Mediasport.az xəbər verir ki, "Ajax Showtime" portalı Ağdam klubunun baş məşqçisi Qurban Qurbanovun uzun illərdir Azərbaycan çempionuna rəhbərlik etməsini vurğulayıb.
Məqalədə Ağdam şəhəri, İkinci Qarabağ müharibəsi haqda qısa məlumat verilib:
"Qarabağ” Ağdam şəhərinin klubudur. Bu şəhər 1990-cı illərin əvvəllərində erməni qoşunları tərəfindən praktiki olaraq dağıdılıb. 2020-ci ildə Azərbaycan, Ermənistan və Rusiya arasında üçtərəfli sazişdən sonra Ermənistan silahlı qüvvələri qoşunlarını oradan çıxarıb. Bundan sonra Azərbaycan qoşunları şəhərə daxil olub və şəhər yenidən Azərbaycanın nəzarətinə keçib.
"Qarabağ" oyunlarını Bakıdakı “Azərsun Arena" və Tofiq Bəhramov stadionunda keçirir. “Ayaks”la görüş isə 30 mindən çox tamaşaçı tutumuna malik olan Tofiq Bəhramovda baş tutacaq. Qonaq azarkeşlər üçün 1560 bilet satışa çıxarılsa da, hamısı satılmayıb. Bakıya uzun səfəri və bununla bağlı xərcləri nəzərə alsaq, bu, məntiqsiz deyil.
Portalda "köhlən atlar"ın heyətində çox sayda legioner futbolçunun olduğu qeyd edilib:
“Qarabağ”ın heyətində Azərbaycandan olan futbolçularla yanaşı, başqa ölkələrdən də çoxlu futbolçu var. Bu komandada Kolumbiya, Braziliya, Kabo-Verde, Əlcəzair, Qana, Fransa, Rusiya, Ukrayna, Polşa və Monteneqrodan olan futbolçular oynayır. Onların əksəriyyəti Azərbaycan millisinin üzvüdür - 14 nəfər.
Yazıda bildirilib ki, komandanın ən dəyərli futbolçusu Azərbaycan millisinin üzvü deyil:
"Heyətdə ən dəyərli oyunçu braziliyalı hücumçu Juninyodur. Ukraynalı cinah hücumçusu Aleksey Kaşşuk və polşalı qolkiper Mateuş Koxalskinin də qiyməti nisbətən bahadır. Amma yenə də “Ayaks”la əhəmiyyətli dərəcədə fərq var.
"Transfermarkt" portalının məlumatına görə, Juninyonun bazar dəyəri 2 milyon avro, bütün komandanın ümumi dəyəri isə 20,23 milyon avrodur.
Erediviziyada cəmi 6 klubun bazar dəyəri bundan aşağıdır. Rotterdamın “Sparta” klubu Azərbaycan təmsilçisindən az qala iki dəfə bahadır.
Bəs “Ayaks”? Burada ən yüksək qiymət Brayan Brobbiyə məxsusdur - 35 milyon avro, Amsterdam klubunun özü isə 222,05 milyon avro dəyərində qiymətləndirilir.
Sayt Qurban Qurbanov barədə təqdimatla çıxış edib:
"Bəs baş məşqçi məsələ necədir? Beş ildən artıqdır ki, klubda çalışan məşqçilər: bunu nə qədər tez-tez görürük? Frank de Bur və Erik ten Haq uzun müddət “Ayaks”ı çalışdırsalar da, Qurban Qurbanov uzun yol qət edib. Hələ Frank de Bur “Ayaks”ı çalışdırmazdan əvvəl Qurban Qurbanov artıq “Qarabağ”a rəhbərlik edirdi.
O, 2008/09 mövsümündən ağdamlıları çalışdırır. O zaman Amsterdam klubunun baş məşqçisi kimin olduğunu xatırlayırsınız? Düzdür, Marko van Basten. Həm də maraqlı fakt: Cordan Henderson həmin mövsüm “Sanderlend”də peşəkar futbolçu kimi debüt etmişdi.
Ötən mövsüm “Qarabağ” Avropa Liqasında yaxşı çıxış etmişdi. Qrup mərhələsində onlar iki dəfə “Bayer”ə (Leverkuzen) uduzsa da, “Mölde” və “Hekken”i qabaqlayaraq ikinci yeri tutdular.
1/16 finalda azərbaycanlılar Portuqaliyanın “Braqa” klubuna qalib gələrək (4:2, 2:3) sürpriz yaratmağı bacardılar. 1/8 finalda yenə sürprizə yaxın idilər və yenə rəqib “Bayer” idi. “Qarabağ” doğma meydanda Juninyo və Benziyanın qolları sayəsində 2:0 öndə olsa da, almanlar oyunun son mərhələsində hesabı bərabərləşdirə bildilər.
Cavab oyununda isə Ağdam klubu yenidən hesabda önə keçmişdi: Zubir və Juninyo qollar vurdu. Belə görünürdü ki, onlar növbəti mərhələyə adlayacaqlar, lakin Frimponq və Şikin qolları “Qarabağ”ı turnirdən kənarda saxladı".
