Futbolçumuz "Ararat"a qarşı: "Ermənistana getməyi çox istəyirəm"
"Mən Ermənistana getməyi çox istəyirəm, digər məsələlər klubun üzərinə düşür".
MediaSport.az xəbər verir ki, bu sözləri "Report"a açıqlamasında Albaniyanın "Eqnatiya" klubu ilə müqavilə bağlayan Azərbaycan millisinin futbolçusu Vüsal İsgəndərli yeni komandasının UEFA Konfrans Liqasının I təsnifat mərhələsində Ermənistan "Ararat"ına qarşı keçirəcəyi oyunlar barədə danışarkən deyib.
28 yaşlı hücumameylli yarımmüdafiəçi bildirib ki, hazırda klub rəsmiləri bu məsələ ilə məşğuldurlar: "Menecerim və idman direktoru soruşdu, mən də getmək istədiyimi dedim".
O, Ermənistan təmsilçisinə qol vurmaq istədiyini söyləyib: "Bilirəm ki, bütün Azərbaycan sözügedən matçda məndən həm yaxşı oyun, həm də qol gözləyir".
"Eqnatiya" komandasına keçidini də şərh edən İsgəndərli başqa ölkələrdən təklif aldığını gizlətməyib: "Amma həm baş məşqçi, həm də klub prezidenti buraya gəlməyimi çox istədi. Mən də karyeramda yeni səhifə açmaq üçün bu komandanı seçdim. Şükürlər olsun ki, Allah yenidən mənə legioner həyatı yaşamağı nəsib etdi".
Qeyd edək ki, Vüsal İsgəndərli "Eqnatiya" ilə 3 illik müqavilə imzalayıb. Albaniya klubu "Ararat"a qarşı ilk oyununu iyulun 13-də səfərdə, cavab matçını isə 1 həftə sonra evdə keçirəcək.
