Nərgiz İsmayılova Çempionlar Liqası matçına təyinat aldı
Azərbaycan Voleybol Federasiyasının “Təlim və aşağı yaş qrupları üzrə iş” şöbəsinin koordinatoru Nərgiz İsmayılova Avropa Voleybol Konfederasiyası tərəfindən beynəlxalq matça təyinat alıb.
Mediasport.az xəbər verir ki, N.İsmayılova yanvarın 8-də qadınlar arasında Çempionlar Liqasının B qrupunda baş tutacaq “Palmberq Şverin” (Almaniya) - “Levallua Paris Sen-Klu" (Fransa) oyununda hakimlərin işinə qiymət verəcək.
Almaniyanın Şverin şəhərində təşkil olunacaq qarşılaşmanın hakimləri ispaniyalı Rodriges Maçin Mariya de las Olas və polşalı Miçliç Aqneşkadır.
Qeyd edək ki, N.İsmayılova Avropa Voleybol Konfederasiyasının bayrağı altında keçirilən oyunlarla yanaşı, bu ildən etibarən Beynəlxalq Voleybol Federasiyası tərəfindən keçiriləcək yarışlara da supervayzer kimi təyinat alacaq.
