Qurban Qurbanov: "Biz də böyük qürur hissi ilə o torpaqlara gedirik"
"Qarabağ" Azərbaycan Kubokunun 1/8 final mərhələsinin MOİK-lə oyunu üçün Xankəndi şəhərinə yolda düşüb.
Mediasport.az xəbər verir ki, Ağdam təmsilçisinin baş məşqçisi Qurban Qurbanov səfərdən öncə "İctimai TV"yə açıqlama verib.
51 yaşlı mütəxəssis Xankəndiyə çox böyük qürur hissi ilə getdiklərini deyib:
"Dünən məşqdə komandada əhval-ruhiyyə yaxşı idi. Çox istərdik ki, bu oyun futbolu daha da sevdirsin. Buna da inanıram, əminəm. Mənə elə gəlir ki, biz oradakı oyun vaxtı daha da qürurlu olacağıq. Hələ də sanki inanmıram desəm, düzgün olmaz. Matçı gözləyirik. Çox şadıq. Bir daha ordumuza, əsgərlərimizə, cənab prezidentə təşəkkür edirəm ki, torpaqların hamısını geri qaytardılar. Biz də böyük qürur hissi ilə o torpaqlara gedirik".
Qurban Qurbanov gələcəkdə Xankəndidə beynəlxalq oyun keçirməyin mümkünlüyü haqda da danışıb:
"Çox istərdik. Bu, gələcəyin planıdır. Çünki bunun üçün hər şey hazır olmalı, stadion standartlara uyğun olmalıdır. Böyük məmnuniyyətlə Xankəndidə beynəlxalq oyun keçirmək istəyərik".
