"Hazırda Avropanın ən yaxşı komandasına qarşı oynayacağıq"
"Sabah hazırda Avropanın ən yaxşı komandasına qarşı oynayacağıq. Yaxşı oyun göstərmək istəyirik. Son iki matçdakından da artıq gücü "Bayer"lə görüşdə sərf etməliyik. Psixoloji cəhətdən böyük təzyiq yoxdur. Çünki onlara qarşı bu mövsüm iki dəfə oynamışıq. Baxımlı, yaxşı futbol üçün ən yaxşısını edəcəyik".
Mediasport.az xəbər verir ki, bu sözləri "Qarabağ"ın müdafiəçisi Bədavi Hüseynov deyib.
Təcrübəli futbolçu UEFA Avropa Liqasının 1/8 final mərhələsinin "Bayer"lə sabah Bakıda baş tutacaq ilk qarşılaşmasından öncə təşkil edilmiş mətbuat konfransında iştirak edib.
"Braqa" ilə görüşdəki ötürməni necə xatırlayırsan? Həmin anda nə düşündün?
- Bir anda gələn qərar idi. Gördüm ki, Nəriman irəlidə dayanıb. Yaxşı ki, baş hakim oyunu dayandırmadı. Şükürlər olsun ki, hər şey yaxşı alındı. Bunun üzərində çox dayanmaq istəməzdim. Komanda yaxşı mübarizə apardı. Hamımızın qələbəsi idi.
Bir neçə gün əvvəl "Qarabağ" FK 30 il səfərdə" filmi göstərildi. Bu film "Qarabağ"ın "Bayer"lə oyunu öncəsi motivasiya verəcək? Ab-hava necə idi?
- Filmi çox bəyəndim. Motivasiya sarıdan filmin dəyəri yüksəkdir. "Qarabağ" adi klub deyil. Bu filmdən sonra dünyaya nümayiş etdirməliyik ki, "Qarabağ"ın necə tarixi var. Yaxşı motivasiyadır.
Sabah Julio Romao və Elvin Cəfərquliyevin yoxluğu nə dərəcədə hiss oluna bilər?
- Komandada hər bir oyunçunun keyfiyyəti yüksəkdir. Bizdə bir futbolçu olmayanda, digəri onu keyfiyyətli şəkildə əvəz edir. Yoxluqları hiss ediləcək. Amma meydana kim çıxsa, ən yaxşısını etməyə çalışacaq.
"Bayer"ə qarşı qrupdakı matçlarda oynamısız. Rəqib ilk növbədə nəyi bağışlamır?
- Həmin oyunda öz səhvlərimizi gördük. Bu cür rəqiblər sənin dərhal asan yerlərini göstərir. Onları analiz etmişik. Son matçlar bizə daha çox motivasiya verib. Biz əvvəlki matçlardan daha yaxşı oyun göstərə bilərik. Hansısa anlarda eyni səviyyədə oynamışdıq. Son oyundan sonra səviyyəmiz də qalxıb. Sabah səhvlərə yol verməməyə, inamlı oynamağa çalışacağıq ki, oyunu yaxşı nəticə ilə başa vuraq.
