Bu mövsüm 17 milyon qazanan "Qarabağ" məbləği artıra bilər
"Qarabağ"ın 2023/2024-cü illər mövsümündə avrokuboklardan əldə etdiyi məbləğ müəyyənləşib.
Mediasport.az xəbər verir ki, "köhlən atlar" indiyə qədər 9 milyon 582 min avro (təxminən 17 milyon 500 min manat) qazanc götürüblər.
Onun 200 mini UEFA Çempionlar Liqasının təsnifat mərhələsində qazanılıb. Qalan məbləğ UEFA Avropa Liqasındakı çıxışdan əldə olunub.
Ağdam təmsilçisinə Avropa Liqasının qrup mərhələsinə yüksəlmək 3 milyon 630 min avro qazanc gətirib. Son 10 ildə avrokuboklardakı reytinqinə görə isə daha 2 milyon 376 min avro klubun büdcəsinə köçürülüb.
Qrup ikincisi olmaq "Qarabağ"a 550 min, pley-offa yüksəlmək isə 500 min avro qazandırıb.
Qurban Qurbanovun çalışdırdığı komanda Avropa Liqasında 1/8 finala yüksəlsə, daha 1,2 milyon avro gəlir əldə edəcək.
Azərbaycan çempionu bunun üçün pley-offda Portuqaliyanın "Braqa" klubunu mübarizədən kənarlaşdırmalıdır.
"Qarabağ" turnirin qalibi olarsa, mövsümlük qazancı 23 milyon 982 min avro təşkil edəcək.
Xatırladaq ki, Ağdam təmsilçisinin "Braqa" ilə ilk görüşü fevralın 15-i səfərdə, cavab qarşılaşması 22-də Bakıda baş tutacaq.
