Avropada derbi həftəsində qeydə alınan bütün nəticələr - VİDEOLAR
Avropa futbolunda geridə buraxdığımız həftə bir-birindən maraqlı və prinsipial matçlarla yadda qaldı.
Mediasport.az xəbər verir ki, 5 fərqli çempionatda keçirilən bolqollu derbilər azarkeşlər üçün həftəsonunu daha da rəngarəng etdi.
Hər zaman dünya futbolunun diqqət mərkəzində olan "Real" - "Barselona" duelində bu dəfə kataloniyalılar qələbə qazandılar.
Hans-Diter Flikin komandası İspaniyanın paytaxtı Madriddə "kral klubu"nu 4 cavabsız qolla üstələdi.
İngiltərə Premyer Liqasında çempionluğa namizəd komandalardan "Arsenal" və "Liverpul" Londonda qarşılaşdılar.
Bu görüşdə də 4 qol vurulsa da, tərəflər meydandan hərəyə 1 xalla ayrıldılar (2:2).
İtaliya A Seriyasında mübarizə aparan "İnter" və "Yuventus"un duelində ümumilikdə 8 qol qeydə alındı.
Milan və Turin təmsilçiləri olduqca gərgin keçən matçda 1 xalla kifayətləndilər.
Fransada son illərin dəyişməz çempionu PSJ səfərdə "Olimpik"in (Marsel) qonağı oldu.
Paris klubu 20-ci dəqiqədən etibarən azlıqda qalan rəqibini 3 cavabsız qolla məğlub etdi.
Türkiyə Superliqasında əzəli rəqiblər, İstanbul nəhəngləri "Qalatasaray" və "Beşiktaş"ın duelində sevinən tərəf birincilər oldu.
Okan Burukun komandası 2:1 hesablı qələbə qazandı.
