Azərbaycan Beynəlxalq Universitet İdmanı Festivalına qatılacaq
Rusiyanın Yekaterinburq şəhərində keçiriləcək Beynəlxalq Universitet İdmanı Festivalına yollanacaq nümayəndə heyəti ilə görüş keçirilib.
mediasport.az xəbər verir ki, Gənclər və İdman Nazirliyinin akt zalında baş tutan tədbirdə Azərbaycanı yarışda Dövlət Bədən Tərbiyəsi və İdman Akademiyasının komandasının təmsil edəcəyi bildirilib.
Yekaterinburqun 300 illiyinə həsr olunan yarışda ümumilikdə 36 ölkə idmançıları iştirak edəcəklər. Azərbaycan 14 idman növündən 7-də təmsil olunacaq. Komanda 69 idmançı, 14 məşqçi, 2 tibb personalı və 7 nümayəndə heyəti ilə avqustun 18-də Rusiyaya yollanacaq. İdmançılardan 54-ü kişi, 15-i qadındır.
Heyətdə yer alan 92 nəfərdən 53-nün bütün xərclərini Yekaterinburq İcra Hakimiyyəti qarşılayacaqsa, 39 nəfəri Azərbaycan Gənclər və İdman Nazirliyi maliyyələşdirəcək.
Qeyd edək ki, Beynəlxalq Universitet İdmanı Festivalı avqustun 19-dan 31-dək keçiriləcək.
