"Hər kəsə sübut etdim ki, yaş heç də həmişə mühüm rol oynamır"
"Həmin gün yaddaşımda silinməz olaraq qalır. Çünki tarixdə ilk dəfə Azərbaycan bayrağı dünya çempionatında ön sırada dalğalandı. Beynəlxalq turnirlərdə bir neçə dəfə mükafatlandırılsam da, mundial fərqli idi".
Mediasport.az xəbər verir ki, bu sözləri cüdö üzrə böyüklər arasında Azərbaycanın yeganə dünya çempionu Elxan Məmmədov deyib.
Azərbaycan Cüdo Federasiyasının mətbuat xidmətinə açıqlama verən 41 yaşlı sabiq idmançı titulu əldə etməsindən 10 il ötdüyünü xatırladıb: "Yaş irəliləyir və elit idmanla vidalaşmalıyam fikirlərinə baxmayaraq, 31 yaşımda karyeramın zirvəsinə yüksəldim və dünya çempionu oldum. Hər kəsə sübut etdim ki, yaş hər zaman mühüm rol oynamır. Əzmkarlığın, ruhən gücün, nizam-intizamın sayəsində yaxşı formada qalmaq olar".
Hazırda gənclərdən ibarət yığmanın baş məşqçisi kimi çalışan mütəxəssis biliklərini və təcrübəsini cüdoçularla paylaşdığını söyləyib: “Cüdo mənim həyatımdır. İndi karyeramı məşqçi kimi davam etdirirəm. Hər turnirə idmançılarla bərabər hazırlaşıram və hər bir görüşün həyəcanını onlar ilə birgə bölüşürəm. Gənclərə uğura aparan yol haqqında bəhs edirəm. Bu yol nə qədər çətin olsa da, şərəflidir, çünki sonu qalibiyyətdir. Onlara peşəkarlığı, nizam-intizamı, mənəvi və fiziki güclü olmağı öyrətməyə çalışıram. Cüdo təkcə idman növü deyil, həmçinin həyat tərzidir”.
Qeyd edək ki, Elxan Məmmədov 2013-cü il avqustun 31-də Braziliyanın Rio-de-Janeyro şəhərində dünya çempionu olub. 2017-ci ildə isə Avropa çempionatında qızıl medal qazanıb.
