“Kəpəz”in də avrokuboklarda “Qarabağ” kimi ölkəmizi təmsil eməsini istəyirəm" - Toğrul Əsgərov
"Mən istəyərdim ki, “Kəpəz” də “Qarabağ” kimi avroturnirlərdə Gəncəni, ölkəmizi təmsil etsin. İnşallah, bu yolda klub tərəfindən müəyyən addımlar atılır”.
Mediasport.az xəbər verir ki, bu sözləri "Kəpəz" televiziyasına açıqlamasında güləş üzrə Olimpiya çempionu Toğrul Əsgərov deyib.
Yeniyetmə qızlardan ibarət güləş üzrə Azərbaycan milli komandasının baş məşqçisi klubda həyata keçirilən layihələrdən danışıb:
“Bilirsiz ki, yeni baza tikilib, akademiya istifadəyə verilib, məktəb yaranır. Bu amillər komandanın inkişaf edəcəyini göstərir. Amma mütləq şəkildə kluba sponsor lazımdı. Böyük maliyyə dayağı olmadan böyük ideyaları həyata keçirmək olmaz. Gəncənin həmişə güclü futbol məktəbi olub. Ona görə də akademiyanın futbolun inkişafına çox böyük faydası olacaq”.
Gəncəli idmançı tikintisi davam edən yeni stadion barədə də fikirlərini bölüşüb. O, azarkeşlərin uzun illər həsrətini çəkdiyi arenanın tamaşaçı sayının artmasına xidmət edəcəyini bildirib:
“Köhnənin yerində yeni stadion tikilir. “Kəpəz” kimi azarkeşi olan futbol komandası çox azdır. Azarkeş kluba üçün böyük dəstəkdir. Klubun azarkeşinin olması rəqiblərlə mübarizəyə 1:0 öndə başlamaq deməkdir. İnanıram ki, yeni tikilən stadionda Gəncə azarkeşlərinin sayı daha da artacaq. Komandamız da uğurlu çıxış edəcək. Biz də nəticələrə sevinib hər zamankı kimi azarkeşlik edəcəyik”.
