ARAŞDIRMA: "Qarabağ"ın İsveç klubları qarşısında üstünlüyü var
Azərbaycanın avrokuboklarda yeganə təmsilçisi “Qarabağ” bu axşam UEFA Avropa Liqasının əsas mərhələsinin 6-cı turu çərçivəsində İsveçin “Elfsborq” klubunun qonağı olacaq.
Matç Ağdam təmsilçisinin isveçlilərlə UEFA yarışlarında 8-ci qarşıdurması olacaq.
Qurban Qurbanovun baş məşqçisi olduğu kollektiv bu skandinaviya ölkəsindən ilk dəfə 2013-cü ildə Avropa Liqasının üçüncü təsnifat mərhələsində “Gefle” ilə üz-üzə gəlib. Hər iki dueldə qələbə qazanan (1:0, 2:0) "köhlən atlar" pley-offa vəsiqə əldə ediblər.
"Qarabağ"ın isveçlilərlə növbəti görüşü 2016-cı ildə Avropa Liqasının pley-off mərhələsində “Göteborq”a qarşı olub - Səfərdə 0:1 hesabı ilə uduzan Azərbaycan çempionu Bakıda 3:0-lıq uğurla adını qrup mərhələsinə yazdırıb.
Komandamız sonrakı illərdə ötən və bu mövsüm İsveç klubu ilə rəqib olub. 2023/2024-cü illər mövsümündə Avropa Liqasının qrup mərhələsində "Hekken"ə hər iki matçda qalib gəlmişik - səfərdə 1:0, evdə 2:1.
Cari mövsüm isə yeni formatda keçirilən Avropa Liqasında "Malmö" sevinən tərəf (2:1) olub ki, bu, İsveç klublarının "Qarabağ" üzərində ikinci qalibiyyətidir.
Ümumi 5 qələbə əldə etmiş ağdamlıların vurulan və buraxılan topların sayında da üstünlüyü var - 10:4.
İsveç klubları və "Qarabağ" arasında növbəti dəfə bu gecə - "Boras Arena”da baş tutacaq qarşılaşma Bakı vaxtı ilə saat 00:00-da start götürəcək.
Ümumən qeyd edək ki, "Qarabağ"ın bu gecə qarşılaşacağı "Elfsborq"un avrokuboklarda Azərbaycan klublarından ovaxtkı "İnter"lə (hazırkı "Şamaxı") də yolları kəsişib. Təmsilçimiz səfərdə qalib gəlsə də (1:0), evdə eyni hesabla uduzub və qolsuz əlavə vaxtın ardından penaltilər seriyasında mərhələni daha dəqiq oynayan skandinaviyalılar keçiblər - 4:3.
Azərbaycan klubları İsveç təmsilçilərinə qarşı
2013/2014-cü illər mövsümü, Avropa Liqası
“Qarabağ” - “Gefle” 1:0, 2:0
2014/2015-ci illər mövsümü, Avropa Liqası
“Elfsborq” - “İnter” 0:1, 1:0, pen., - 4:3
2016/2017-ci illər mövsümü, Avropa Liqası
“Göteborq” - “Qarabağ” 1:0, 0:3
2023/2024-cü illər mövsümü, Avropa Liqası
“Hekken" - “Qarabağ” 0:1, 1:2
2024/2025-ci illər mövsümü, Avropa Liqası
“Qarabağ” - “Malmö” 1:2
Mediasport.az
