Avropa çempionatı və Yay Olimpiya Oyunları İTV-də canlı yayımlanacaq
İdmanın şahı futbolun azarkeşləri başda olmaqla, bütün idmansevərlərin diqqəti bu yay İctimai Televiziyada (İTV) olacaq.
Mediasport.az xəbər verir ki, milyonlarla teletamaşaçısı olan futbol üzrə Avropa çempionatı (Avro-2024) və 4 illiyin zirvə yarışı Yay Olimpiya Oyunları İTV-də yayımlanacaq.
Bu gündən iyulun 14-nə kimi İctimai Televiziyada bir ay boyunca futbol bayramı yaşanacaq.
Almaniyada keçiriləcək Avro-2024-ün bütün oyunları həm İTV-də, həm də rəsmi İTV-nin yutub hesabında canlı yayımlanmaqla, futbol azarkeşləri üçün əlçatan olacaq. Hər hansı oyunu canlı izləmək imkanı olmayanlar isə operativ şəkildə İTV-nin rəsmi yutub kanalında da yerləşdiriləcək icmalları, vurulan qolları təkrar-təkrar izləmək imkanı əldə edəcəklər.
Bundan əlavə, qitə çempionatı ərzində ən maraqlı oyunlarının paralel olaraq İctimai Radio – 90 FM vasitəsilə də yayımı nəzərdə tutulub.
Qısa fasilədən sonra İTV-də idman həyəcanı tam sürətlə davam edəcək.
Bu dəfə planetin ən möhtəşəm idman yarışması, iyulun 26-dan avqustun 11-nə kimi davam edəcək “Paris-2024” Yay Olimpiya Oyunları idman həvəskarlarına təqdim olunacaq.
Bütün idmançılarımızın çıxışları, Olimpiadanın rekordlar, sevinc və üzüntü ilə zəngin olan ən maraqlı, emosional anları İTV-nin efirində yaşanacaq.
