Əfsanəvi Canluici Buffona UEFA-nın xüsusi mükafatı veriləcək
21 il (1997/2018) İtaliya milli komandasının şərəfini qorumuş Canluici Buffona UEFA tərəfindən xüsusi mükafat veriləcək.
Mediasport.az xəbər verir ki, veteran qapıçı 1998-ci ildə təsis edilmiş UEFA prezidenti mükafatına layiq görülüb.
Avropa futbol təşkilatının prezidenti Aleksandr Çeferin açıqlamasında 2024-ci il üçün mükafata ən çox Buffonun layiq olduğunu deyib.
Mükafat görkəmli futbol xadimləri, onların nailiyyətləri, peşəkar və nümunəvi şəxsi keyfiyyətləri ilə seçilən futbolçular üçün təsis olunub.
Daim nümunəvi çıxışlar, şəxsiyyətli və peşəkar davranışlar nümayiş etdirmiş 46 yaşlı sabiq qolkiper İtaliya millisinin tarixində ən çox oyun keçirən futbolçu olmaqla yanaşı, Avropa qitəsində ən çox meydana çıxmış 4-cü futbolçudur.
2006-cı ilin dünya çempionuna mükafat avqustun 29-da baş tutacaq UEFA Çempionlar Liqasının əsas mərhələsinin püşkatma mərasimində veriləcək.
Xatırladaq ki, son olaraq mükafat ötən il Almaniya yığmasının sabiq futbolçusu Miroslav Klozeyə təqdim edilib.
