Kapitan Emin Mahmudov zədəli deyil! - "Neftçi"də İLGİNC HADİSƏ
"Neftçi"nin kapitanı Emin Mahmudov yeni mövsümə başqa komandada başlayacaq.
Mediasport.az saytı "ağ-qaralar"ın düşərgəsindən ilginc məlumat əldə edib.
İnformasiyaya görə, 3 turdur meydana çıxmayan yarımmüdafiəçi əslində zədəli deyil.
32 yaşlı futbolçunun baş məşqçi Miodraq Bojoviçlə aralarında ciddi problem yarandığı bildirilir.
Mətbuata bir müddətdir Mahmudovun zədəli olduğu deyilsə də, kapitan monteneqrolu mütəxəssisin məşqləri və oyun planından narazılıq etdiyi üçün "cəzalandırılır".
Bojoviçlə "kəllə-kəlləyə" gələn və "qələmi qırılan" milli komandamızın üzvünün mövsümün sonunda "Sabah"a keçəcəyi gözlənilir.
Xatırladaq ki, ötən mövsümün sonunda maaşının qaldırılması üçün paytaxt təmsilçisi ilə müqaviləni yeniləməyi uzun müddət ertələyən futbolçu, nəhayət, 2023-cü ilin iyulunda 2+1 illik anlaşmaya qol çəkmişdi.
O, 2017-ci ildən Bakı klubunun formasını geyinir.
