Qurban Qurbanovla Rəşad Sadıqov məşhur idmançının baş rol aldığı filmin təqdimat mərasiminə qatılıb
"Azərbaycan Atabəyləri" tarixi bədii-sənədli filmin qala gecəsi keçirilib.
Mediasport.az xəbər verir ki, ekran işi Mədəniyyət Nazirliyi, Azərbaycan Respublikası Kino Agentliyi (ARKA), Azərbaycan Televiziyası, “Şahdağfilm” və Türkiyənin “İkinciYeniFilm”, “Patik Prodüksiyon” və “Ernet Grup” prodakşnlarının birgə iştirakı ilə çəkilib.
Mərasimdə dövlət və hökumət rəsmiləri, millət vəkilləri, tanınmış mədəniyyət xadimləri, idman adamları və digər qonaqlar iştirak ediblər.
Açılışa qatılanlar arasında "Qarabağ" klubunun baş məşqçisi Qurban Qurbanov və "Zirə" klubunun baş məşqçisi Rəşad Sadıqov da yer alıblar.
Filmin quruluşçu rejissoru Məcit Güvən, ssenari müəllifləri Sərvər Bayramov, İlqar Mehti, Səxavət Sahil və Ərcan Kayadır. Prodüserlər İlqar Mehti, Sərvər Bayramov və Türkiyədən “İkinciYeniFilm”i təmsil edən Furkan Bəsli, quruluşçu rəssam isə Zəfər Malkoçdur.
Bədii-sənədli filmdə tanınmış K1 döyüşçüsü Zabit Səmədov əsas rolda çəkilib. O, tarixi şəxsiyyət Şəmsəddin Eldəniz obrazını canlandırıb.
