Fabian Buntiç: "Vacib məqamlarda düzgün qərarlar verə bilmədik"
"Dinamo" düşən fürsətlərdən maksimum yararlandı. Biz isə vacib məqamlarda düzgün qərarlar verə bilmədik".
Mediasport.az xəbər verir ki, bu sözləri "Qarabağ"ın qapıçısı Fabian Buntiç deyib.
Xorvatiyalı qolkiper "CBC Sport" kanalına açıqlamasında UEFA Çempionlar Liqası pley-off mərhələsinin "Dinamo" ilə ilk görüşü haqqında danışıb.
27 yaşlı əlcək sahibi Xorvatiya klubuna 0:3 hesablı məğlubiyyəti şərh edib:
"Güclü rəqibə qarşı mübarizə apardıq. Oyun çətin keçdi. Qarşıda bizi cavab oyunu gözləyir. Xarakter göstərməliyik. İnanıram ki, lazımı nəticəni əldə edəcəyik".
Buntiç əsas heyətdə qalıb-qalmayacağına baş məşqçinin qərar verəcəyini söyləyib:
"Əsas heyətdə nə qədər meydana çıxacam? Bu barədə fikrim yoxdur. Çünki baş məşqçi hansı qərarı qəbul etsə, razılaşacam".
Xatırladaq ki, "Qarabağ"ın "Dinamo" ilə cavab qarşılaşması avqustun 28-də Tofiq Bəhramov adına Respublika stadionunda baş tutacaq.
