"Millinin oyunlarından narazılıqlar var" - MOK-un vitse-prezidenti
Xəbər verdiyimiz kimi, AFFA-nın növbəti Konfransı keçirilir.
Konfransı AFFA-nın hazırkı prezidenti Rövnəq Abdullayev açıq elan edib.
Daha sonra Milli Olimpiya Komitəsinin (MOK) baş katibi Çingiz Hüseynzadə çıxış edərək Azərbaycanda son illərdə futbolun inkişaf etdiyini bildirib:
"Bu gün Azərbyacan futbolunun ön möhtəşəm günlərindən biridir. Hesab edirəm ki, bu nəinki illik konfransdır, bu son 16 ilin hesabatına bənzəyən konfransdır. Mən belə qəbul edirəm. İllər keçir, Azərbaycan futbolu inkişaf edir. Haradan buralara gəlib çıxmışıq, unutmamalıyıq.
30 il bundan əvvəl, mən prezident aparatında çalışırdım. Bir hadisə baş verdi. Azərbaycan İsraillə oynamalı idi. Lakin heç bir stadionumuz qəbul olunmadı. Ulu öndər maraqlandı, məni də çağırdılar ki, niyə Azərbaycanda bir stadion yoxdur ki orada oyun keçirək? Onda Ulu öndərə Tofiq Bəhramova adına Respublika Stadionunun şəkillərini göstərdilər. Futbol meydançasında qoyunlar otarırdılar.
Ulu Öndər dedi ki, Sumqayıtda gözəl stadion tikmişdik, o stadion nə vəziyyətdədir. Dedilər o da elə durumdadır ki, beynəlxalq oyunlar keçirmək olmaz. Məcburiyyətdən Trabzonda oynadıq. Bunu nəyə görə yada salıram? Bu gün Azərbaycanda çox güclü futbol infrastukturu var. Azərbaycan futbolda müəyyən sözünü demiş ölkədir.
Son illərdə “Qarabağ”ın nəticələrini böyük sevinc hissi ilə yaşayırıq. Bunlar hamısı son 15-16 ildə həyata keçirilmiş tədbirlərin nəticəsidir. Ona görə də, yeni seçiləcək heyətə uğurlar arzu etməklə yanaşı, bu dövrdə əziyyət çəkmiş, Azərbaycan futboluna hərtərəfli dəstək olmuş insanlara təşəkkür edirəm. Onların əməyidir ki, bu durumdayıq.
Düzdür, mediada tənqidlər olur. Hətta millinin oyunlarından narazılıqlar var. Tənqid iş olan yerdədir. Olimpiya Komitəsində buna adət etmişik. Olimpiya çempionlarının sayı artdıqca, tənqidlərin də sayı artır. Bu normal hadisədir. Ümid edirəm ki, Azərbaycan futbolu bundan sonra da inkişaf edib, yeni-yeni nailiyyətlər qazanacaq".
