"Neftçi"dən tarixi antirekord - Ardıcıl 10 oyundur qələbə qazanmır
Azərbaycan Premyer Liqasında 9-cu turun “Kəpəz” - “Neftçi” matçı yarışın cari mövsümünün ən məhsuldar oyunu olub.
Mediasport.az xəbər verir ki, meydan sahiblərinin 4:3 hesabı ilə qalib gəldikləri görüşədək ən məhsuldar qarşılaşmada 6 top qeydə alınıb.
VII turun “Səbail” – “Sabah” görüşündə qonaqlar qalib gəliblər – 4:2.
Bununla da “Neftçi” çempionatdakı qələbəsizlik seriyasını 10-a çatdırıb.
Ötən mövsümün son turunda “Sabah”a 0:1 hesabı ilə uduzan “ağ-qaralar” cari çempionatın 9 görüşündə 5 heç-heçə edib və 4 dəfə məğlub olub.
Mayın 18-də “Səbail” üzərində 3:0 hesablı qələbədən sonrakı ardıcıl 10 qalibiyyətsizlik “Neftçi”nin tarixində yeni antirekorddur.
Bakı klubu 2015-ci ildəki 9 matçlıq seriyanı “arxada qoyub”. 2014/15 və 2015/16 mövsümlərini əhatə edən həmin seriya müddətində 5 heç-heçə və 4 məğlubiyyət yaşanıb.
“Neftçi” həm də tarixində ilk dəfə 3 və daha çox qol vurduğu görüşdə uduzub. Ölkə çempionatları tarixində isə 28-ci belə hadisə yaşanıb.
