"Qələbə və məğlubiyyətdən kənar” foto müsabiqəsinə yekun vuruldu
Azərbaycan Milli Antidopinq Agentliyi (AMADA) ilə Gilavar Foto Klubunun birgə təşkil etdiyi “Olimpiya ruhu: Qələbə və məğlubiyyətdən kənar” adlı beynəlxalq foto müsabiqəsinə yekun vurulub.
Mediasport.az xəbər verir ki, Beynəlxalq Bədii Fotoqraflar Assosiasiyasının (IAAP) platforması üzərindən beynəlxalq fotoqrafiya qaydaları əsasında təşkil olunan müsabiqənin mövzuları arasında qələbə sevinci, məğlubiyyətdən doğan məyusluq, Oyunlarda yaddaqalan məqamlar, təmiz idman ruhu və ədalətli idman prinsiplərinin təbliği yer alıb.
Seçim prosesində Azərbaycan idmançılarının əcnəbi fotoqraflar tərəfindən çəkilən fotoşəkillərinə xüsusi diqqət yetirilib.
Müsabiqəyə 27 ölkədən 53 fotoqraf 205 foto təqdim edib. Beynəlxalq dərəcəli fotoqraflar İlqar Cəfərov (Azərbaycan), Umberto Deramo (İtaliya) və Yasser Alaa Mobarakın (Misir) yer aldığı münsiflər heyətinin qiymətləndirməsi nəticəsində 25 fotoqraf mükafatçılar sırasında yer alıb.
Azərbaycandan üç fotoqraf – Dilavər Nəcəfov, Zaur Mustafayev və Naib Əhmədovun fotoları da mükafata layiq görülüb.
Xatırladaq ki, AMADA-nın dekabrın 16-da Bakıda təşkil olunan “Təmiz qələbə: Olimpiya ilinə yeni baxış” adlı beynəlxalq konfransında müsabiqənin qalib fotolarından ibarət sərgi nümayiş olunub.
