"Rusiyaya gəlişimin mənim üçün üzücü olduğunu deyə bilmərəm"
Bugünlərdə "Qarabağ"dan ayrılaraq "Krasnodar"a keçən Kadi Borges Rusiya mətbuatına müsahibə verib.
mediasport.az həmin müsahibəni təqdim edir:
Artıq bir aydır ki, “Krasnodar”dasan, komanda haqda ilk təəssüratların necədir?
- Hər şeyi bəyənirəm. Klubun təşkilatçılıq səviyyəsi məni çox heyran etdi, burada çoxlu peşəkarlar var. Hər bir idmançı üçün hər gün inkişaf etmək, işləmək və daha yaxşı olmaq üçün klubun necə yaşaması vacibdir. “Krasnodar” bunun üçün əlindən gələni edir.
Sizi necə qarşıladılar? Bəzi ölkələrdə yeni komandada oxumaq adətdir, sizin hansı ritualınız var idi?
- Məni yaxşı qarşıladılar, amma xüsusi rituallar yox idi, burada oxumağa ehtiyac yoxdur. Yaxşı qarşılandığım üçün minnətdaram. Oxumaq lazım olsa, oxuyacam. Mən bunu yaxşı bacarıram.
Hər halda il yarım “Qarabağ”da qaldıqdan sonra rus dilinə yəqin artıq bələdsən. “Krasnodar”da rus dilini öyrənmiş Kristian Ramires var, ondan nümunə götürəcəksən?
- Bəli, mən artıq rus dili ilə tanışam, çünki “Qarabağ”ın məşqçisi bu dildə danışırdı. Orada da bir çox oyunçu rusca danışırdı, ona görə sizin diliniz mənə tanışdır. Düzdür, Azərbaycanda ingilis dilini öyrənməyə diqqət yetirdim, çünki məşqçi bu dildə də danışırdı. Amma həyat yoldaşım yanıma gələn kimi rus dilini öyrənməyi planlaşdırıram. Bu mənim üçün çox vacibdir, biz onunla müəllimlə işləyəcəyik. İndi bir neçə söz deyə bilərəm: “Yaxşı, davam et, geriyə, sağ ol, buyurun”. Mən yaxşı başa düşürəm, amma hələ də danışmaq çətindir.
“Krasnodar”ın sabiq çalışdırıcısı Murad Musayev hazırda Azərbaycanda çalışır. Səni ölkə çempionatının ən yaxşı oyunçusu adlandırmışdı, onunla razısan?
- Bəli, razıyam (gülür).
“Qarabağ”da il yarımlıq karyeran ərzində 28 qol vurub, 28 məhsuldar ötürmə vermisən. “Krasnodar"la 3,5 illik müqavilən var, ona görə də daha çox qol vurmaq şansın yaranacaq. Məsələn, “Krasnodar"da 50 qol vurub, 50 məhsuldar ötürmə verə bilərsən?
- Bəli, məncə bacararam. Artıq uzaq məsafədən qollar vura biləcəyimi göstərmişəm. Bunun üçün çalışacam. Hər bir idmançının əsas məqsədi inkişafdır. Bu alınarsa, təkcə özümə deyil, kluba da xeyir verərəm və bu, çox vacibdir.
Bu yaxınlarda "Qarabağ"la Azərbaycan çempionluğu və kubokunu qazandın. "Krasnodar"ın hələ böyük titullarının olmadığı barədə məlumatlısan? Bəlkə bunun üçün sən çatışmırdın?
- Niyə də yox? “Krasnodar”a komandaya gələn yaxşı futbolçular lazımdır. Çalışacam ki, “Krasnodar”a ilk kubokları qazandırım.
“Krasnodar”a keçmək variantın necə alındı?
- Keçən ilin sonunda tətil başlamazdan bir həftə əvvəl bildim ki, “Krasnodar” mənimlə maraqlanır. Adətən transfer işi ilə məşğul olmuram, bunun üçün agentim var. Əvvəlcə “Krasnodar”ın təzminat ödəməyə hazır olduğunu düşünmürdüm, çünki ondan üç ay əvvəl “Qarabağ”la yeni müqavilə bağlamışdım. Amma klubun məni nə qədər çox istədiyi bəlli olanda, agentə bu çağırışı qəbul etmək istədiyimi bildirdim. Mənim üçün bu, böyük sınaqdır. Çox xoşbəxtəm, böyük gözləntilərim var.
Rusiyanın digər klublarından da təklif var idi?
- Rusiyadan bir neçə təklif var idi, amma əvvəllər. Hələ “Qarabağ”la yeni müqavilə imzalamadan əvvəl. Hansı klublar? Mən rusca cavab verəcəm: "Bu, sirrdir!"
“Qarabağ”da Rusiya ilə bağlı bir neçə futbolçu var. Məsələn, Ramil Şeydayev hətta “Zenit"də də oynayıb. “Krasnodar"a keçməzdən əvvəl onunla və ya digər futbolçularla məsləhətləşmisən?
- Bəli, onlarla danışdım, klub və infrastrukturla bağlı sual verdim. Mən özüm yalnız matçlara baxa bilirdim, amma “Krasnodar” haqda çox şey bilmirdim. Onların cavabları seçimimi müəyyənləşdirdi. İndi gözəl stadionumuzda oynamağı səbirsizliklə gözləyirəm.
“Qarabağ” Konfrans Liqasının pley-off mərhələsində çıxış edir. Avrokubokların olmadığı Rusiya futboluna gəlmək üzücü deyildi?
- Mənim üçün üzücü olduğunu deyə bilmərəm. Mən şüurlu şəkildə bu seçimi etmişəm. Təbii ki, hamı avrokuboklarda oynamaq istəyir, Rusiya üçün mümkün deyil hazırda. Çoxları ümid edir ki, bu turnirlər tezliklə Rusiyaya qayıdacaq. Həyat elə qurulub ki, seçim edərkən həmişə nəyisə itirirsən və qazanırsan.
Azərbaycanda il yarım qaldın. Bu ölkədə ən yaddaqalan anlar hansıdır?
- Bakını çox bəyənirdim. Bu yaşamaq üçün gözəl şəhər, çox gözəl yerdir.
Ötən il komanda Çempionlar Liqasının qrup mərhələsinə düşə bilməyəndə bir qədər bəxtiniz gətirmədi. “Krasnodar"la bunu etməyin mümkün olacağına inanırsan?
- Bu mənim arzumdur. Təbii ki, “Qarabağ”la Çempionlar Liqasının qrup mərhələsinə düşə bilmədik, son addım kifayət etmədi. Ümid edirəm ki, “Krasnodar” yaxın vaxtlarda Avropa futboluna qayıda biləcək. Mən bunu həqiqətən istəyirəm.
