Yeni ilin ilk reytinq siyahısı: Məmmədyarov yüksəlişdə
Yeni ilin ilk reytinq siyahısını Beynəlxalq Şahmat Federasiyası (FİDE) açıqlayıb.
Mediasport.az xəbər verir ki, azərbaycanı təmsil edən 5 şahmatçı yanvarın cədvəlində irəliləyib.
Şəhriyar Məmmədyarov hesabındakı 2726 xalla iki pillə irəliləyərək, 24-cü yerə yüksəlib. Teymur Rəcəbov (27-ci yer, 2723 xal) mövqeyində qalıb.
İlk "100-lük"dəki digər şahmatçımız Rauf Məmmədovda da irəliləmə müşahidə olunub. O, 2651 xalla 87-ci pilləyə yüksəlib. Nicat Abasov isə siyahını tərk edib.
Reytinqə son Dünya Kubokunun qalibi olan norveçli Maqnus Karlsen (2830) başçılıq edir. İkinci pillədə ABŞ təmsilçisi Fabiano Karuana (2804) qərarlaşıb. Bu ölkənin digər qrossmeysteri Nikaru Nakamura (2788) ilk "üçlüy"ü qapayıb.
Qadın şahmatçılardan Günay Məmmədzadə (2449) 26-cı, Ülviyyə Fətəliyeva (2384) 64-cü pilləyə yüksəliblər. Gövhər Beydullayeva (2374) 77-ci yerdə qalıb. Gülnar Məmmədova da (2351) 97-ci pilləyə irəliləyib. Xanım Balacayeva isə bir addım geriləyib (99-cu yer, 2350 xal).
Xanım şahmatçıların reytinqində birinci yer Hou İfana (Çin, 2632) məxsusdur. Hindistandan olan Xampi Koneru (2554) ikinci pilləyə yüksəlib. FİDE bayrağı altında çıxış edən Aleksandra Qoryaçkina (2553) üçüncüdür.
