"Böyük Dəbilqə" Heydər Əliyevin 100 illik yubileyinə həsr ediləcək
Sentyabrın 22-24-də Bakıda keçiriləcək cüdo üzrə "Böyük Dəbilqə" turniri Ümummilli Lider Heydər Əliyevin anadan olmasının 100-cü ildönümünə həsr ediləcək.
mediasport.az xəbər verir ki, rəsmi olaraq “Heydar Aliyev Baku Grand Slam 2023” adlandırılacaq yarış Milli Gimnastika Arenasında keçiriləcək.
Turnirdə 60-dan çox ölkədən 350-dən artıq idmançının iştirakı gözlənilir. Böyük Dəbilqənin dünyanın 100-dən çox ölkəsinə canlı yayımlanması planlaşdırılır.
Beynəlxalq Cüdo Federasiyasının istisna olaraq icazə verdiyi bu hal Ulu Öndər Heydər Əliyevin Azərbaycanda idmanın və cüdonun inkişafına verdiyi əvəzedilməz töhfənin beynəlxalq idman ictimaiyyəti tərəfindən də tanındığını göstərir.
