Bakıda keçirilən dünya çempionatının 13 rekordu
Bakıda keçirilən atıcılıq üzrə 53-cü dünya çempionatını maraqlı edən məqamlardan biri də rekordlardır.
Azərbaycan Atıcılıq Federasiyasından "Mediasport"a verilən məlumata görə, avqustun 29-dək mundialda 7 yeni rekord qeydə alınıb, 6 növdə isə mütləq nəticə təkrarlanıb.
Xüsusilə kişilər arasında 25 metr məsafəyə tapançadan cəld atəşaçma növündə qızıl medal qazanan Li Yuehonq tarixi rekorda imza atıb. O, mümkün 40 atışdan 39-nu dəqiq yerinə yetirməklə buna nail olub.
50 metr məsafəyə 3 mövqedən atəş üzrə qadınlar arasında yarışda ABŞ komandası 1774 xal toplayaraq yeni dünya rekordu müəyyənləşdirib. Şimali amerikalılar əvvəlki göstəricini 19 xal yaxşlaşdırıblar.
Dairəvi stend atıcılığında da qadınlardan ibarət ABŞ komandası yeni rekorda sahib çıxıb. Ostin Ceuell Smit, Dania Jo Vitsi və Samanta Simonton "üçlüy"ü 365 xalla buna nail olublar.
ABŞ təmsilçiləri dairəvi stend atıcılığının qarışıq komanda növündə də rekord imza atıblar. Təsnifat mərhələsində Ostin Ceuell Smit və Vinsent Hankok cütlüyü 149 xal toplayaraq bu uğuru gerçəkləşdiriblər.
50 metr məsafəyə uzanaraq atəşaçma yarışının qarışıq komanda növündə isveçrəlilər rekord sahibi olublar. Çiara Leone və Yan Loxbihler cütlüyü ümumilikdə 1249.7 xal toplayıblar.
Bakı mundialının yaddaqalan atıcılarından biri 19 yaşlı çinli Qiongyu Janq olub. Gənc olmasına baxmayaraq, böyüklərlə mübarizəyə qatılaraq 50 metr məsafəyə 3 mövqedən atəş üzrə qadınlar arasında yarışda çıxış edən idmançı qızıl medal qazanmaqla 2 uğura imza atıb. Təsnifat mərhələsində dünya rekordu qıran Q.Janq finalda da buna nail olub.
Təkrarlanan rekordların sayı isə daha çoxdur. Kişilər arasında 25 metr məsafəyə tapançadan cəld atəşaçma yarışlarında Çin komandası 1756 xal toplamaqla son rekorda çatıb.
Qadınlar arasında 25 metr məsafəyə tapancadan atəşaçma yarışında Doren Vennekamp mümkün 40 xal toplamaqla rekordu təkrarlayıb.
300 metr məsafəyə uzanaraq atəşaçma növündə qızıl medal qazanan 60 yaşlı Raymond Debeveç 3-cü dəfə dünya çempionu olmaqla yanaşı, maksimum - 600 xal toplayaraq dünya rekordunu təkrarlayıb.
Stend atıcılığının səngər növündə qadınlardan ibarət İtaliya komandası 354 xal toplayaraq dünya rekordunu təkrarlayıb.
Kişilərin dairəvi stend atıcılığında isə 2 idmançı bu uğura nail olub. ABŞ təmsilçisi Vinsnet Hankok və misirli Azmi Mehelba mümkün 125 xalın hamısını toplamağı bacarıblar.
Beynəlxalq Atıcılıq İdman Federasiyasının məlumatına görə, indiyədək atıcılıq üzrə heç bir dünya çempionatında bu qədər rekord qeydə alınmayıb.
Qeyd edək ki, Bakıda keçirilən atıcılıq üzrə 53-cü dünya çempionatı 2018-ci ildən bəri dünyada bu yarış üzrə baş tutan ən kütləvi idman tədbiridir. Yarışda dünyanın 100-dən artıq ölkəsindən 2000-dək idmançı və nümayəndə iştirak edir.
