Elmar Baxşıyev: "Avrokuboklar uğrunda mübarizə aparacağıq"
"Qəbələ" Azərbaycan Premyer Liqasının 17-ci turu çərçivəsində səfərdə "Qarabağ"a 0:1 hesabı ilə məğlub olub.
mediasport.az xəbər verir ki, qonaqların baş məşqçisi Elmar Baxşıyev jurnalistlərin suallarını cavablandırıb:
- Beş gündən bir oynasaq da, matçın dinamikası xoşuma gəldi. Komandam oyunun sonuna kimi tempi saxlaya bildi. Kollektiv şəkildə "Qarabağ"a qarşı layiqli mübarizə apardıq. Heç-heçə də edə bilərdik. Bəzi epizodları dəyərləndirə bilsəydik, nəticə fərqli ola bilərdi. Ümumi götürəndə komandanın oyunundan razı qaldım. Futbolçular mən istədiyimi meydanda verir.
Xal qazanmaq üçün nə çatmadı?
- Dinamikanı saxlamaq özü böyük güc tələb edir. Futbolçularıma təşəkkür edirəm ki, tempi aşağı salmadılar. Ağır dönəmdəyik. Amma komanda müsbət impuls verir. İnanıram ki, getdikcə daha da yaxşı oyun nümayiş etdirəcəyik.
Hakimliklə bağlı fikriniz necədir?
- İlk hissədə 11 metrlik cərimə zərbəsi ilə bağlı irad bildirmirdim. Sadəcə, oyunçumuza sarı vərəqə göstərilməsinə etirazımı bildirdim. Hakimləri müzakirə etmək istəmirəm. Onların da öz rəhbərləri var. İnanırıq ki, onlara lazımi tapşırıqları verəcəklər. Mənim üzərimə komandama qiymət vermək düşür.
Avrokuboklara vəsiqə qazanmaq şansını necə dəyərləndirirsiz?
- Mövsüm uzundur. İndidən nə mən, nə komanda bu barədə düşünür. Yalnız qarşıdakı oyunu düşünürük. Olacaqsa, çox yaxşı. Avrokuboklar uğrunda mübarizə aparacağıq.
