"Gəncədən olan iş adamlarından dəstək görmürük" - MÜSAHİBƏ
Mediasport.az “Kəpəz”in İdarə Heyətinin sədri İlqar Nadirinin klubun rəsmi saytına müsahibəsini təqdim edir:
İlqar müəllim, AFFA rəhbərliyi tərəfindən yeni inşa olunan akademiyaya baxış keçirildi və bina istifadəyə tam hazırdı. Sizcə, bu akademiya Gəncə, ümumilikdə Azərbaycan futboluna nə verəcək?
- Akademiyaya görə AFFA rəhbərliyinə, əziyyəti keçən hər bir şəxsə minnətdarlığımızı bildiririk. Klub olaraq bizim də müəyyən zəhmətimiz olub. Çox şükürlər olsun ki, görülən bütün işlərin qarşılığında müasir standartlara cavab verən Gəncə Futbol Akademiyası və Məşq Mərkəzi “Kəpəz”in ixtiyarına verildi. Bu işdə AFFA-nın böyük dəstəyi olub. Akademiya şəhərimizdə futbolun inkişafına dəstək olacaq. Hər cür şəraitə malik qurğu futbolun inkişafı üçün baza rolunu oynayacaq. İnanırıq ki, tezliklə akademiyadan əvvəlki illərdə olduğu kimi Azərbaycan futbolu üçün layiqli oyunçular çıxacaq.
Bugünlərdə kluba avtobus da alındı. Avtobus necə əldə olundu?
- Futbolun İnkişafı Fondu (FİF) tərəfindən ötən il “Kəpəz100k” layihəsinə start verilmişdi. Fond tərəfindən hazırlanan platforma çox maraqlı olduğu kimi, şəffaf şəkildə də həyata keçirildi. Bu layihəni hər zaman diqqət mərkəzində saxlamağa çalışdıq. Çox təəssüflər olsun ki, azarkeşlər tərəfindən bu işə xususi maraq göstərilmədi və layihə tamamlanmadı. 100 000 manatın yığılması planlaşdırılmışdı. Ona görə də avtobusun alınması yubandı. Daha tez bir müddətdə kluba nəqliyyat vasitəsi ala bilərdik. Düzdü, müəyyən qism şəxslər sağ olsunlar, dəstək göstərdilər. Şəxsən istəyim o idi ki, tezliklə komandanın avtobusu olsun. Layihənin tamamlanıb-tamamlanmamasından asılı olmayaraq, avtobus almağın yollarını axtarırdım. Klubun öz büdcəsindən və müəyyən dostlarımız tərəfindən edilən yardımlar sayəsində avtobusu alaraq komandanın ixtiyarına verdik. İnanırıq ki, bu nəqliyyat vasitəsi bizi qələbələrə doğru aparacaq. O ki qaldı piksel alanların şəkillərinin vurulmasına, proses yekunlaşan kimi bu, ediləcək və layihə ilə bağlı hesabat təqdim olunacaq. Cəmi 14 faiz məbləğ yığıldı. Bəzi şirkətlər var ki, bu layihədə iştirak etməsələr də, kluba ianələr etmişdilər və onların loqosu layihədə əks olundu.
AFFA rəhbərliyi tərəfindən akademiyaya baxış, kluba avtobus alınaraq təqdim olunması və səfərdə qələbə eyni günə təsadüf etdi…
- Eyni gündə xoş hadisələrin bir-birini əvəzləməsi günü yaddaqalan etdi. Gəncədəki iki tədbirdən sonra vaxt azlığına baxmayaraq, özümüzü Sumqayıta çatdırıb komandanın qələbəsinə stadiondan şahidlik etdik. Komanda qış fasiləsindən sonra daha inamlı çıxış edir. Bunun da başlıca səbəbi futbolçuların özlərinə güvənməsidir. Bu işdə baş məşqçinin və köməkçilərinin əziyyəti danılmazdır. Azarkeşləri də unutmaq olmaz. Onlar hər addımda bizim yanımızdadırlar. Hamımız bir yerdə qarşılıqlı işləyirik və nəticələr əldə olunur. Futbolçuların əzmkarlığını, hər oyunda sona kimi layiqli mübarizə aparmalarını xüsusi ilə qeyd emək lazımdır. Onlara minnətdarıq. Bizim məqsədimiz komandanı elitada saxlamaqdır. İnşallah, bunu bacaracağımıza inanırıq.
Stadionun tikilməsi ilə “Kəpəz”in daha bir problemi həllini tapacaq. İşlər necə gedir?
- Bildiyiniz kimi, cənab Prezident İlham Əliyevin ötən il imzaladığı müvafiq sərəncam əsasında Gəncədə yeni stadion inşa olunacaq. Arena sökülüb, artıq inşaat işləri başlayıb. İdman qurğusu Gənclər və İdman Nazirliyinin balansında olduğu üçün aparılan işlər ilə bağlı ən dolğun məlumatlar həmin qurumdadır. Bizim bildiyimiz arenanın 2025-ci ildə tikilərək təhvil verilməsidir. İnanırıq ki, yeni stadion komandanın çıxışına əlavə güc, qüdrət verəcək. Demək olar ki, bir neçə il öncəyə qədər də infrastruktur yararsız vəziyyətdə idi. Baza, stadion istənilən kimi deyildi və istismar müddətini başa vurmuşdu, məşq meydanları yox idi. Yüksək səviyyədə olan akademiya və Məşq Mərkəzi klubun ixtiyarına verilib. Bununla yanaşı, stadion məsələsi də öz həllini tapıb.
Sponsorla bağlı məsələ nə yerdədir?
- Bu məsələ hələ öz həllini tapmayıb. Bu, bizdən asılı olmayan səbəblərə görədir. Ümumiyyətlə, futbol sahəsində sponsor tapmaq nəinki “Kəpəz”, digər klublar üçün də asan deyil. Bu proses FİF tərəfindən də icra olunur. Premyer Liqa klubuna sponsor böyük şirkət və ya şirkətlər ola bilər. Bizim klub olaraq bir çox şirkətlər və şəxslərlə görüşlərimiz olub. Amma təəssüflər olsun ki, yekun olaraq nəticə əldə edə bilməmişik. Gəncədən olan iş adamlarından dəstək görmürük. Gəncə ölkənin ikinci böyük şəhəridir və bunun olmaması təəssüfləndirici məqamdır. Dostlarımız var ki, müəyyən formada mənəvi dəstək olurlar. Amma klubun əlavə maddi gücü yoxdur. Məqsədimiz Premyer Liqada yerimizi qoruyub saxlamaqla yanaşı, sponsor, əlavə maliyyə dəstəyi tapıb daha üst sıralar üçün mübarizə aparacaq komanda formalaşdırmaqdır.
Bugünlərdə “Elite Club Programme” təhsil layihəsində iştirak etdiz. Bu, idarəedici kimi sizə nə verəcək?
- AFFA və UEFA Akademiyasının birgə əməkdaşlığı çərçivəsində həyata keçirilən təhsil layihəsi üç mərhələdən ibarət idi. Mərhələlərdən ikisi Bakıda, biri isə Almaniyada təşkil olunmuşdu. İlk dəfə keçirilən bu təhsil proqramında klub idarəetmə sisteminə aid müxtəliv mövzularda müzakirələr aparılıb, təcrübələr bölüşülüb. Klubların maliyyəsinin idarə edilməsi, büdcənin idarə menecmenti, oyun təşkilinin əsas elementləri, oyun günü təcrübəsinin genişləndirilməsi, akademiyanın idarə olunması və s. mövzular istiqamətində bilgilər verilib. Təhsil layihəsi müddətində klub nümayəndələri faydalı məlumatlar alıblar, biliklərini daha da artırıblar. Bu təhsil proqramı gələcəkdə Azərbaycan futbolunun inkişafına kömək olacaq.
