Salman Süleymanovun xatirə turnirində qaliblər müəyyənləşib
Azərbaycan Şahmat Federasiyasının (AŞF) dəstəyi ilə ölkəmizdə şahmatın inkişafında böyük xidmətləri olan əməkdar məşqçi Salman Süleymanovun xatirə turniri keçirilib.
Mediasport.az xəbər verir ki, "Sabah" Şahmat Akademiyasında sürətli şahmat üzrə təşkil olunan yarışda yeniyetmələr, Avropa, dünya çempionları, Azərbaycan çempionatının medalçıları və qalibləri mübarizə aparıblar.
Açılış mərasimində AŞF-nin Uşaq və Gənclər Komissiyasının sədri, qrossmeyster, Əməkdar məşqçi Fərid Abbasov və AŞF-nin İcraiyyə Komitəsinin üzvi, qrossmeyster, Əməkdar məşqçi Cahangir Ağarəhimov çıxış edərək yeni şahmat nəslinin inkişafında Salman Süleymanovun rolundan danışıblar.
İlk dəfə keçirilən turnirdə Abdulla Qədimbəyli rapid yarışında bütün rəqiblərini üstələyib. Blits üzrə mübarizədə İslam Hacıəliyev qələbə qazanıb. Qadınlar arasında rapid mübarizəsində ən yaxşı nəticəni Ayan Allahverdiyeva göstərib. Blits üzrə isə Nurtan Nuriyeva qalib adını qazanıb.
Turnirdə fərqlənənlərə pul mükafatları verilib.
