"İrəvanda Azərbaycan bayrağının yandırılması ikiqat məsuliyyət oldu"
Xorvatiyanın paytaxtı Zaqrebdə başa çatmış Avropa çempionatında 6 medal (2 qızıl, 3 gümüş və 1 bürünc) qazanmış yunan-Roma güləşçilərimiz vətənə qayıdıblar.
mediasport.az xəbər verir ki, komanda hesabında Avropa ikincisi olmuş yığmanın baş məşqçisi Aleksandr Tarakanov və medal qazanmış idmançılarımız təəəssüratlarını bölüşüblər.
Aleksandr Tarakanov, milli komandanın baş məşqçisi:
“Avropa çempionatına yaxşı hazırlaşmışdıq. Zaqrebdə keçirilən Reytinq turnirindən sonra ölkə xaricində 2 təlim-məşq toplanışı keçdik. Xorvatiyada və Gürcüstanda hazırlıq prosesində iştirak etdik. Komandamız qitə birinciliyində uğurlu çıxış etdi. Bundan sonra bütün diqqətimizi sentyabrda keçiriləcək lisenziya xarakterli Dünya çempionatına yönəldəcəyik. Federasiya rəhbərliyi beynəlxalq arenalarda uğurlu çıxış etməyimiz üçün lazım olan bütün şəraiti yaradır”.
Ülvü Qənizadə, Avropa çempionu:
“Karyeramda ilk dəfə Avropa çempionu oldum. Buna görə çox sevinirəm. Məni ilk təbrik edən anam oldu. Qələbəmi şəhidlərimizin və atamın ruhuna həsr edirəm. Növbəti hədəfim dünya çempionu olmaqdır. Arxayınlaşmaq olmaz. İnanıram ki, bu nəticələrin ardı gələcək.
Taleh Məmmədov, Avropa ikincisi:
“İrəvandakı ağırlıqqaldırma üzrə Avropa çempionatında Azərbaycan bayrağının yandırılması güləşçilərimiz üçün ikiqat məsuliyyət oldu və komandanın əhvali-ruhiyyəsinə müsbət təsir etdi, idmançıları daha da ruhlandırdı. Ermənistan idmançısıyla artıq dördüncü dəfədir qarşılaşıram. Özüm elə taktika seçdim ki, birinci hissədə parterdə oturum, ikinci hissədə isə bütün var gücümü qoyaraq qələbə qazanım. Elə qurduğum taktika ilə də getdim. Rəqib bilirdi ki, bundan öncəki yarışda onu qaldırıb atmışam və bunu yenə etmək istəyəcəyəm. Ancaq ondan müdafiə olunurdu deyə başqa fənd etməli oldum. Həmin fəndin üzərində işləmişdim, icra edib qələbə qazanaraq finala vəsiqə qazandım. Növbəti hədəfim dünya çempionu olmaqdır. Serbiyada qızıl medal qazanıb, karyeramı başa vurmaq istəyirəm”.
Xorvatiyada Həsrət Cəfərovla (67 kq) Ülvü Qənizadə (72 kq) Avropa çempionu olub. Eldəniz Əzizli (55 kq), Taleh Məmmədov (63 kq) və Sabah Şəriəti (130 kq) gümüş, Nihat Məmmədli (130 kq) isə bürünc medal qazanıb.
