Azərbaycan birinciliyinə rekord sayda idmançı iştirak edəcək
Gənclər və İdman Nazirliyi ilə Azərbaycan Kanoe və Avarçəkmə Federasiyasının (AKAF) 2024-cü il planına əsasən keçiriləcək Azərbaycan birinciliyində rekord sayda idmançı iştirak edəcək.
Mediasport.az xəbər verir ki, yarış 23-24 fevral tarixlərində Mingəçevirdə yerləşən “Kür” Olimpiya Tədris-İdman Mərkəzində baş tutacaq.
Birincilikdə Bakı və Mingəçevirdən olan 2006-2007, 2008-2009 və 2010-2011-ci il təvəllüdlü 100-dən çox avarçəkən mübarizə aparacaq. Bu da son illərdə avarçəkmə üzrə keçirilən ölkədaxili turnirlərdə rekord göstəricidir.
Qaliblər diplom və medallarla mükafatlandırılacaqlar. Eyni zamanda fərqlənən idmançılar mayda Ümummilli Lider Heydər Əliyevin xatirəsinə həsr edilən “Prezident Kuboku-2024” beynəlxalq reqatasında iştirak edərək, yığmanın heyətinə cəlb ediləcəklər.
