Samir Abasovun cəzası açıqlanıb
AFFA İntizam Komitəsinin iclası keçirilib.
Mediasport.az xəbər verir ki, toplantıda çıxarılan qərarla "Sumqayıt"ın baş məşqçisi Samir Abasov cəzalandırılıb.
Buna 45 yaşlı mütəxəssisin "Neftçi"yə 2:1 hesabı ilə qalib gəldikləri Premyer Liqanın XIII turunun oyunu başa çatdıqdan sonra etdiyi qeyri-idman hərəkəti səbəb olub.
Abasov buna görə 1 oyunluq cəza alıb, həmçinin senyabrın 19-da təyin edilən 3 aylıq sınaq müddəti başa çatmamış növbəti dəfə qırmızı vərəqə aldığına görə həmin tarixdə verilən 2 oyunluq şərti cəza üzərinə əlavə edilməklə, ümumilikdə, 3 matçlıq cəzaya məruz qalıb., "gənclik şəhəri" təmsilçisi 1000 manat cərimələnib.
"Neftçi" həmin qarşılaşma bitdikdən sonra meydana kənar şəxslərin daxil olmasına görə 800 manat ödəyəcək.
Hər iki kollektiv 4 oyunçusu sarı vərəqə aldığı üçün 700 manat ziyana düşüb.
