Avropa çempionu: "Ölkəm üçün medal qazanmaq böyük şərəfdir"
"Komanda yoldaşlarımın himnimizi oxuduğunu görmək çox gözəl idi. Ölkəm üçün medal qazanmaq böyük şərəfdir".
MediaSport.az xəbər verir ki, bu sözləri Portuqaliyanın Odivelas şəhərində keçirilən Avropa çempionatında ölkəmizin 6-cı qızıl medalını qazanan yığma komandamızın yeniyetmə cüdoçusu Ramazan Əhmədov deyib.
90 kq-da çempion olan gənc idmançımız Beynəlxalq Cüdo Federasiyasının rəsmi saytına açıqlamasında sevincini bölüşüb: "Komandaya daha bir qızıl medal qazandırmaq məni çox sevindirdi. Final görüşündən əvvəl məşqçilərimlə taktiki gedişləri müzakirə etmişdim. Sevinirəm ki, sonda hər şey alındı".
Qeyd edək ki, Avropa çempionatının fərdi yarışlarını 9 medalla başa vuran Azərbaycan millisi komanda hesabında birinci yeri tutub. Millimiz aktivinə 6 qızıl, 3 bürünc medal yazdırıb.
