Ayxan Abbasov "Sabah" üzərində böyükhesablı qələbəni şərh etdi
"Turan Tovuz" Azərbaycan Premyer Liqasının 5-ci turunun açılış oyununda "Sabah"ın qapısından 3 cavabsız top keçirib.
Mediasport.az xəbər verir ki, qərb klubunun baş məşqçisi Ayxan Abbasov komandasının Masazırda rəsmiləşdirdiyi darmadağın haqda fikirlərini bölüşüb.
Gənc mütəxəssis möhtəşəm qələbə qazandıqlarını deyib:
"Səfərdə qələbə qazanmağımız möhtəşəm idi. Keçən oyun hər iki komanda məğlub olmuşdu. Bilirdik ki, "Sabah" iki oyun ardıcıl məğlub olmaq istəməyəcək, ilk dəqiqələrdən aqressiyasını ortaya qoyacaq. Futbolçularım bu gün soyuqqanlı oynadılar, tapşırıqları yerinə yetirdilər. Bir daha əmin oluruq ki, çempionat gərgin keçəcək. İstirahətə gedirik. Çalışacağıq ki, bundan səmərəli istifadə edək. Bəzi futbolçularımız formasını bərpa etməlidir. Zədəlilərimiz var. Bütün futbolçularıma inanıram. Rəhbərliyə təşəkkürümü bildirirəm. Məğlub olduqda, çətin anlarımızda arxamızda durdular, dəstək oldular. Azarkeşlərimizə təşəkkür etmək istəyirəm. Yenə də bizi tək buraxmadılar. Bizi qarşıda çətin oyunlar gözləyir. Hazırlaşacağıq".
