Azərbaycanın "ağır artilleriya"sının yarısı olimpiadaya yola düşdü
Azərbaycanın güləş üzrə olimpiya komandasının yarısı bu gün Fransaya yollanıb.
Mediasport.az xəbər verir ki, yunan-Roma güləşçiləri – Murad Məmmədov (60 kq), Həsrət Cəfərov (67 kq), Sənan Süleymanov (77 kq), Rafiq Hüseynov (87 kq) və Sabah Şəriəti (130 kq), eləcə də qadın güləşçimiz Mariya Stadnik (50 kq) Yay Olimpiya Oyunlarında iştirak etmək üçün Parisə yola düşüblər.
Heydər Əliyev Beynəlxalq Aeroportunda keçirilən yolasalma mərasimində Gənclər və İdman Nazirliyinin, Azərbaycan Güləş Federasiyasının rəsmiləri, məşqçilər, digər güləşçilərimiz və olimpiyaçıların yaxınları iştirak ediblər.
Avqustun 5-də Murad Məmmədov və Sabah Şəriəti, növbəti gün Sənan Süleymanov (77 kq) və Mariya Stadnik (50 kq), Həsrət Cəfərovla (67 kq) Rafiq Hüseynov (87 kq) isə avqustun 7-də mübarizəyə start verəcək.
Qeyd edək ki, olimpiadanın son günlərində çıxış edəcək sərbəst güləşçilərimiz avqustun 6-da Parisə yollanacaqlar.
Olimpiya Oyunları avqustun 11-də başa çatacaq.
