"Bütün şahmatçılar ölkə çempionatında iştirak etməlidirlər"
Qadın şahmatçılar arasında keçirilən ölkə çempionatında yer tutan idmançılar mükafatlandırılıb.
Mediasport.az xəbər verir ki, Azərbaycan Şahmat Federasiyasında baş tutan tədbirdə ilk "5-lik"də qərarlaşan zəka sahibləri öz mükafatlarını alıblar.
Yer tutan şahmatçılara medalları Azərbaycan Şahmat Federasiyasının prezidenti Mahir Məmmədov və vitse-prezident Faiq Həsənov təqdim edib.
Qeyd edək ki, builki çempionatın qalibi 7 turda 5,5 xal toplayan Ayan Allahverdiyeva olub. Rəqibindən yarım xal geri qalan Nərmin Abdinova 2-ci, eyni xala malik Səbinə İbrahimova 3-cü, hərəyə 4,5 xal toplayan Ləman Hacıyeva ilə Səbinə Rzalı müvafiq olaraq 4-5-ci yerləri bölüşüblər.
Azərbaycan Şahmat Federasiyasının prezidenti Mahir Məmmədov mükafatlandırma mərasimində təssüratlarını bölüşüb.
Qurum rəhbəri deyib ki, bütün şahmatçılar Azərbaycan çempionatında iştirak etməlidirlər:
"Azərbaycan çempionatı şahmatımızın gələcəyi üçün çox vacibdir. Təəssüf ki, bütün şahmatçıları cəlb edə bilmədik. Bu il buna hazır deyildik. Azərbaycanın 5 şahmatçısı xüsusi proqramda hazırlaşırlar. Ancaq 2025-ci ildə bütün şahmatçılar ölkə çempionatında iştirak etməlidirlər. Azərbaycan çempionu üçün bu dövrdə xüsusi təqaüd proqramı olacaq. 4-5-ci yerləri tutanlar da bir dəfə beynəlxalq turnirdə iştirak hüququna malik olacaqlar".
