"Baş hakim vurduğum bir qolu saymadı" - "Sabah"ın mərakeşlisi
"Sabah" futbol üzrə Azərbaycan Premyer Liqasının 16-cı turunda "Səbail"i 4:0 hesabı ilə məğlub edib.
Mediasport.az xəbər verir ki, Masazır klubunun mərakeşli müdafiəçi Sofian Çakla oyundan sonra jurnalistlərin suallarını cavablandırıb.
Qarşılaşma haqqında fikirlərin maraqlıdır.
- Oyun yaxşı keçdi, "Səbail" sona qədər mübarizə apardı. Biz də bacardığımızı etdik və sevinirəm ki, yekunda qələbə qazandıq.
"Sabah"da ilk qollarını vurdun. Təəssüratların necədir?
- Əlbəttə ki, qollar vurub komandama kömək etdiyim üçün çox şadam. Gələcəkdə çalışacam ki, daha çox qol vurum.
Matç başa çatan kimi topu özünlə götürdün.
- Baş hakim vurduğum bir qolu saymadı. Bunu ona eyham vurmaq üçün etdim (gülür).
Son oyunlarda qol buraxmadan qalib gəlirsiz.
- Bəli, istəyirik bunun davamını gətirək. Əlimizdən gələnin ən yaxşısını edəcəyik.
Növbəti tur "Araz-Naxçıvan"ın qonağı olacaqsız.
- "Araz-Naxçıvan" yaxşı kollektivdir. Bu matça xüsusi konsentrasiya olmalıyıq. Bu görüşdə də qələbə qazanmağa çalışacağıq.
