"Mənim həmişə "Neftçi"yə hörmətim olub" - Qurban Qurbanov

"Çətin komandaya qarşı oynayırdıq. Görünürdü ki, "Neftçi" çox ciddi hazırlaşıb. Bəlkə də tam istədiyimiz kimi oyuna nəzarət edə bilmədik. Amma futbolçularımı təbrik edirəm. Vacib qələbə qazandıq. Azarkeşlər üçün çox maraqlı matç idi. Hər iki komanda sürətli, dinamik oynadı. Rəqibə uğurlar arzulayıram. Çox yaşı ab-hava var idi. Hər iki komandanın azarkeşlərinə təşəkkür edirəm ki, komandaları dəstəklədilər, futbolçuları daim oyunun içində olmağa kömək oldular".

Mediasport.az xəbər verir ki, bu sözləri “Qarabağ”ın baş məşqçisi Qurban Qurbanov deyib.

Təcrübəli mütəxəssis Azərbaycan Premyer Liqasının 25-ci turunun “Neftçi” ilə oyunu haqda fikirlərini bölüşüb, jurnalistlərin suallarını cavablandırıb.

Demək olar ki, bu gün "Bayer"ə qarşı oynayacaq heyəti sınaqdan keçirdiz?

- Çox ciddi dəyişiklik gözlənmir. Qarşıda üç gün var. Rəqibin oyununa da baxıb analiz edəcəyik. Bəlkə 1-2 dəyişiklik oldu. Amma ciddi dəyişiklik ehtimal edilmir.

Dediz ki, rəqib oyuna ciddi hazırlaşmışdı, 4:1 hesabı ilə qalib gəldiniz. "Neftçi" ciddi hazırlaşmasaydı, necə olacaqdı?

- Son dəqiqələrdə iki qol vurduq. Əks-hücumdan sonra oldu. "Neftçi" riskə getmişdi. Bu cür oyunlarda 2:1, 3:1 bir o qədər fərq etmir. Çünki itiriləcək bir şeyləri yox idi. Ona görə daha çox sayda futbolçular irəli atılırlar.

Artıq ən yaxın izləyicinizlə xal fərqi 23-ə yüksəldi. Qarşıdakı turlarda təcrübələrini artırmaq baxımından əvəzedici heyətin oyunçularını da meydanda görə bilərik?

- İnanın ki, xal fərqi 23 olsa da, bu haqda heç nə düşünmürəm. Futbolçu öz ritmindən düşməli deyil. Görürsüz ki, demək olar, bəzən iki heyətdə də dəyişiklik edirəm. Oyunçular tonusda qalmalıdırlar. Ona görə vaxt itirə bilmərəm ki, hansısa oyunçu oyun ritmindən düşsün. Perspektivli oyunçuların hamısı bizimlədirlər, məşq edirlər. Amma oyunları hələ fikirləşmirəm.

"Bayer"lə oyun üçün hansısa taktiki gedişi sınamaq imkanınız oldu?

- Oldu, amma cüzi. Bəzi epizodlar var idi ki, etdik.

Rəqib komandanın azarkeşləri sizi alqışlayırdı. Hansı hissləri keçirirdiz?

- Təşəkkür edirəm. Biz azərbaycanlıyıq. Mənim həmişə "Neftçi"yə hörmətim olub. Bu komandada olmasaq da, "Neftçi"nin uğur qazanmasını həmişə istəmişik. Onlara uğurlar arzulayıram, hər birinə təşəkkür edirəm.

"Qarabağ"ın ən yaxın izləyicinsən 23 xal öndə olması faktı var. Bu uçurumun səbəbini nə ilə əsaslandırardız?

- Turnir cədvəlindəki vəziyyətə uçurum kimi baxmayaq. Əksinə, komplekt olunmuş komanda kimi baxaq məsələyə. Ola bilər ki, bizim oyunlarımız daha uğurlu keçdi, nəinki rəqiblərin. Biz bütün oyunlara ciddi hazırlaşacağıq. Məsələyə uçurum kimi baxsaq, ziyanımıza işləyər. Elə oyunlarımız olub ki, çox gərgin keçib, son dəqiqələrdə qol vurmuşuq. Sadəcə, ola bilər ki, ustalıq keyfiyyətləri önə çıxıb. Amma çempionatımız asan deyil, gərgin keçir. Hər bir komanda digərinə qarşı düzgün, dinamik oyun oynaya bilir. 

Leandro Andradenin performansında qışdan sonra eniş var. Razısız?

- Ola bilər. Amma bəzən biz futbolçunu tam idman formasında saxlaya bilmirik. Bəzən görürsən ki, oyun praktikası çatmır. Andrade elə oyunçudur ki, daha çox oynamalıdır. Onun potensialı yüksəkdir. Razıyam ki, daha yaxşı oynaya bilər. Gözləyirik, tələb edirik və inanırıq da.

"Bayer"lə oyunun biletləri, demək olar ki, 1 sutkaya satılıb qurtardı. Bu matçı BOS-da keçirmək olardı?

- Bizim azarkeşlər, elə sizlər də Tofiq Bəhramov stadionuna öyrəşmisiz. Ora bir az fərqlidir. Bir oyun üçün başqa stadiona getmək, futbolçuda diskomfort yarada bilər. Tofiq Bəhramov stadionunda sanki hamı evin içində olur, daha inamlı hiss edirlər özlərini. Çünki ilboyu orada daha çox oyun oynayıblar. Bu, üstünlük ola bilər. Amma 30-35 min azarkeşimiz elə 68-70 min kimidir.

Son oyunlarda daha çox ikinci yarıda qollar vurursuz. Ardıcıl iki matçda 8 belə qolunuz var. Bunu necə izah edə bilərsiz?

- Bu, oyunun gedişatına görədir. Elə olub ki, ilk yarıda da 3-4 qol vurmuşuq. İlk dəqiqələrdə, ilk hissədə futbolçu daha aktiv, intizamlı olur. İkinci yarıda hansısa komandaya qalibiyyət lazımdırsa, oyun açılır, daha çox qol epizodu yaranır. Yəqin ki, bundan daha yaxşı istifadə edirik.